Sentyabrın 12-də Azərbaycan Tibb Universitetinin Tədris-Cərrahiyyə Klinikasının açılışında iştirak edən prezident İlham Əliyev Azərbaycanda səhiyyə sahəsində işlər ən yüksək səviyyədə görüldüyünü bildirib.
“Deyə bilərəm ki, Azərbaycanda son illər ərzində yaradılmış tibbi mərkəzlər arasında bu gün bu mərkəzin xüsusi yeri vardır. Öz gözəlliyi, memarlığı və funksional cəhətləri ilə seçilən bir klinikadır.
O vaxt belə bir klinikanın yaradılması iki məqsədi güdürdü. İlk növbədə, qarşıda Azərbaycan Tibb Universitetində tədris prosesini daha da yüksək səviyyəyə qaldırmaq məsələsi dayanmışdı. Eyni zamanda, bütün cərrahiyyə yönümlü kafedraları bir yerə yığmaq məsələsi qarşıya qoyulmuşdu. Biz buna nail olduq. Eyni zamanda, Azərbaycanda yeni, müasir tibb mərkəzinin yaradılması da təmin edilmişdir”.
Prezident deyib ki, son illər ərzində Azərbaycanda 500-ə yaxın tibb mərkəzi tikilib. On beş şəhərdə diaqnostika mərkəzi yaradılıb.
Ölkə başçısının sözlərinə görə, bu gün müstəqil Azərbaycanda səhiyyə sahəsinə ayrılan xərclər artır, səhiyyənin maddi-texniki bazası möhkəmlənir. Belə olan halda əlbəttə ki, tibbi xidmətin səviyyəsi də artmalıdır.
”Elə etməliyik ki, gənc nəsil, gənc həkimlər dünyada səhiyyə sahəsində gedən bütün prosesləri yaxından izləyə bilsinlər. Bunu etmək üçün burada imkanlar, kompyuter otaqları vardır. Əminəm ki, müxtəlif ali məktəblərlə canlı bağlantı da yaradıla bilər. Əməliyyatların izlənməsi üçün gözəl şərait vardır”.
Prezident deyib ki, o, dünyada tibb sahəsində gedən ən son yeniliklərin, ixtiraların Azərbaycanda da tətbiq olunmasını istəyir.
”Biz buna hazır olmalıyıq. Yaradılan maddi-texniki baza, müasir avadanlıq belə imkanları verir. Həkimlərin peşəkarlığı, bilikləri artmalıdır. Həkimlər daim öz fəaliyyətləri, işləri ilə elə etməlidirlər ki, daha da bilikli olsunlar. Elə edək ki, Azərbaycanda istənilən ən ağır əməliyyat aparıla bilsin. Son illərdə deyə bilərəm ki, biz buna nail ola bilmişik. Çünki bu gün Azərbaycanda ən ağır ürək-damar əməliyyatları, orqan transplantasiyaları aparılır. Ancaq sirr deyil ki, bəzi insanlar, xüsusilə imkanlı insanlar müalicə üçün hələ də daha çox xaricə üz tuturlar. Biz elə bir vəziyyət yaratmalıyıq ki, buna ehtiyac olmasın. Azərbaycanda ən yüksək tibbi xidmət, ən yüksək peşəkarlıq olmalıdır. Mən əminəm ki, birgə səylər, həm dövlət tərəfindən aparılan siyasət, yeni tibb ocaqlarının yaradılması, müasir avadanlığın mövcudluğu və həm də həkimlərin peşəkarlığı, təkmilləşməsi bizi bu məqsədə nail olmağa gətirib çıxaracaqdır.
Bu yaxınlarda mən təhsillə bağlı fikirlərimi bildirdim. Bir daha demək istəyirəm, elə etməliyik ki, bizim gənclər xaricə oxumağa getməyə ehtiyac duymasınlar. Azərbaycanda təhsilin səviyyəsi elə olmalıdır ki, burada ən yüksək təhsil almaq üçün imkan olsun. Səhiyyə sahəsində də, həmçinin biz o səviyyəni əlbəttə ki, təmin etməliyik. Əminəm ki, biz buna nail olacağıq. Çünki son illərdə səhiyyə sahəsində aparılan islahatlar uğurludur, bununla bərabər hələ çox iş görülməlidir. Ancaq beynəlxalq təşkilatlar, o cümlədən Dünya Səhiyyə Təşkilatı Azərbaycanın bu sahədəki fəaliyyətini yüksək qiymətləndirir. Bir müddət əvvəl Dünya Səhiyyə Təşkilatının Avropa bölməsi Azərbaycanda gedən islahatları vurğulamışdır”.
Tibb sahəsinə diqqətin artdığını deyən ölkə başçısı onu da bildirib ki, statistik göstəricilərə görə, Azərbaycanda insanların ömrünün uzunluğu artır, uşaq ölümü azalır. Bu isə səhiyyənin səviyyəsini göstərən əsas amillərdən biridir.
Görüşdə iştirak edən akademik Adilə Namazova prezidentdən Tibb Universiteti üçün yeni klinikanın tikintisinə yardım göstərməyi xahiş edib.
"Siz bizə çox qayğı göstərmisiniz, bizim həyatımızı çox dəyişdirmisiniz. Mən Sizdən bir xahiş etmək istəyirəm. Bizim Tibb Universitetində on pediatrik kafedramız vardır. On altı tibb elmləri doktoru, professor çalışır. Pediatriya üzrə 50-yə yaxın dosentimiz vardır. İki yüzdən çox tibb üzrə fəlsəfə doktoru çalışır. Burada doktorantların, dissertantların sayını deyib vaxtınızı almaq istəmirəm. Üçüncü ildir ki, biz rezidentlərlə məşğuluq. Yəni, onları qəbul edib dörd il müddətində biz Sizin köməkliyinizlə xalqa gözəl, yüksək səviyyəli həkimlər verəcəyik. Bizim bu kafedralar, bu işçilər demək olar ki, Bakı şəhərinin bütün rayonlarına səpələnibdir...
... Siz bizə belə bir pediatrik klinika bəxş etsəniz, bizi də, respublikanın uşaqlarını da çox xoşbəxt etmiş olarsınız. Bilirsiniz ki, respublikamızda əhalinin sayı artıb, bu gün 9 milyon 400 mindir. İnşallah, gələn payıza 10 milyon olacaqlar. Deməli, respublikada doğum çoxalıb. Tək-tək yox, əkiz, üçəm uşaqlar doğulur. Beləliklə, respublikamızda uşaqların sayı 43-44 faizə çatıbdır. Onların keşiyində durmaq üçün bizə savadlı pediatrlar lazımdır.
Siz bilirsiniz ki, atalar, analar, babalar, nənələr uşaqları nə dərəcədə çox istəyirlər. Biz istəyirik ki, Sizin köməyinizlə onların qayğısına daha yaxından qalaq, onları sağlam böyüdək. Mən Sizə söz verirəm ki, respublikamız üçün çox yaxşı pediatrlar yetişdirəcəyik. Çünki belə şəraitdə işləmək özü böyük xoşbəxtlikdir. Allah Sizə cansağlığı versin, ömrünüz uzun olsun və bu işləri daha da yeniləşdirəsiniz, - çünki Siz novatorsunuz, - bizə də kömək edəsiniz"-deyə Adilə Namazova bildirib.
Prezident İlham Əliyev təklifi müsbət qiymətləndirərərk, buna baxılacağını qeyd edib. "Hesab edirəm ki, bu təklifə müsbət cavab verilə bilər. Xahiş edirəm ki, siz yeri seçin, Təklifi rəsmi qaydada göndərin. Pediatrik klinikanın tikintisinə də müsbət münasibət ola bilər".
Modern.az
