Dənizkənarı Bulvarda təhlükəli atraksionların istifadəsi dayandırılıb. Modern.az xəbər verir ki, bulvar ərazisində quraşdırılan bir neçə atrasksion təhlükəli olduğundan sökülüb. Mədəniyyət və Turizm Nazirliyinin göstərişi əsasında söküldüyü deyilən əyləncə qurğularının Ukraynaya satıldığı da iddia olunur.
Dənizkənarı Bulvar İdarəsinin rəis müavini Nazim Məcidov Modern.az-a açıqlamasında bulvarda yerləşən atraksionlardan ikisinin yığışdırıldığını etiraf etdi.
Onun sözlərinə görə, Mədəniyyət və Turizm Nazirliyinin bulvar idarəsinə göstəriş vermək səlahiyyəti yoxdur. “Bulvar İdarəsi yaranandan, yəni 2008-ci ildən bu günə kimi 40-a yaxın atraksion sökülüb. Amma son günlər iki atraksion Milli Park ərazisindən yığışdırılıb. Amma bu, Mədəniyyət və Turizm Nazirliyinin göstərişi ilə baş verməyib. Bulvar İdarəsi yalnız Nazirlər Kabinetinə tabedir”.
Rəis müavini onu da qeyd edib ki, bulvarda daima yenidənqurma işləri aparılır, ərazisi genişləndirilir, proyekti dəyişir. Odur ki, həmin atraksionların gələcəkdə başqa ərazidə quraşdırılacağı nəzərdə tutulub.
Gültəkin ƏLƏSGƏR
