Modern.az xəbər verir ki, Milli Elmlər Akademiyası Riyaziyyat və Mexanika İnstitutunda AMEA-nın təsisçiliyi ilə nəşr olunan elmi jurnalların beynəlxalq tələblərə uyğunlaşdırılması məqsədilə iclas keçirilib.
AMEA-nın həqiqi üzvü, AMEA-nın fizika-riyaziyyat və texnika elmləri bölməsinin akademik-katibi Akif Hacıyev, AMEA-nın Riyaziyyat və Mexanika İnstitutunun direktoru, fizika-riyaziyyat elmləri doktoru, professor Misir Mərdanovun rəhbərliyi ilə keçirilən iclasda institutun elmi şurasının üzvləri və bir qrup əməkdaşları iştirak ediblər.
Müzakirə zamanı bildirilib ki, qloballaşan dünyada hər bir ölkənin davamlı inkişafını təmin edən sahələrdən biri kimi elmin nüfuzunun artması və elmi jurnalların beynəlxalq standartlara uyğunlaşdırılması tələbi aktuallaşır. Bu səbəbdən Riyaziyyat və Mexanika İnstitutunda nəşr olunan elmi jurnalların beynəlxalq tələblərə uyğunlaşdırılması, alimlərin dünyanın tanınmış beynəlxalq elmi bazalarında təmsil olunması, bir sözlə Azərbaycan elminin dünya elminə inteqrasiyası prosesinin sürətləndirilməsi zəruridir.
Sonda problemin kompleks həlli ilə bağlı rəy və təkliflər səsləndirilib, M.Mərdanov institut əməkdaşlarına tapşırıqlarını verib.
Modern.az
