İtaliyanın Bolonya şəhərində məşhur Piza qülləsinin orta əsr yadigarı olan qüllə çökə bilər.
Modern.az BBC telekanalına istinadən xəbər verir ki, bu səbəbdən şəhər meriyası onu bağlayıb.
Şəhər rəhbərliyi XII əsrə aid Qarisenda qülləsinin çökəcəyi təhlükəsini nəzərə alaraq, dağıntıların qarşısını almaq məqsədilə onun ətrafında 5 metr hündürlüyündə hasar tikməyə başlayıb. Meriyanın məlumatında qeyd edilib ki, 47 metr hündürlüyündə olan qüllə 4 dərəcə bucaq altında əyilir və aparılan monitorinq əyilmə istiqamətində sürüşmələr də aşkar edib. Şəhər Şurası vəziyyətin “çox kritik” olduğunu bildirib.
“Garisenda Tower” Bolonya səmasına doğru ucalan iki qədim qüllədən biridir. Digəri, Asinelli qülləsi təxminən iki dəfə hündürdür və bu tikili də əyilir, amma turistlərin ziyarəti üçün açıqdır.
Qüllələr 1109 və 1119-cu illər arasında tikilib. Məşhur Qarisenda qülləsi Dantenin 1321-ci ildə tamamlanan “İlahi komediya” poemasında da xatırlanır.
Bolonya meriyası qülləni qorumaq üçün mülki müdafiə planı hazırlayıb və hazırda onun möhkəmləndirilməsi üzrə işin birinci mərhələsi aparılır. Bildirilib ki, tikilən sədd dağıntıları saxlamaqla yanaşı, çökmə zamanı ətrafdakı binaları və insanları qoruyacaq. Qüllənin ətrafında metal qaya torlarının da quraşdırılması nəzərdə tutulur. Təkcə səddin tikilməsi 4,3 milyon avroya başa gələcək. Şəhər rəhbərliyi qeyd edir ki, turistlərin sevimli məkanı olan bu qüllənin bərpası ən mühüm vəzifələrdən biridir.
