Azərbaycan Respublikası Dini Qurumlarla İş üzrə Dövlət Komitəsinin (DQİDK ) sədri Elşad İskəndərov İran İslam Respublikasına rəsmi səfəri çərçivəsində Qum şəhərində Azərbayandan olan tələbələrin də təhsil aldığı “Cameətül Mustafa” Universitetinin rəhbərliyi və orada təhsil alan azərbaycanlı tələbələrin bir qrupu ilə görüşüb.
DQİDK-nin mətbuat xidmətindən Modern.az-a verilən məlumata görə, azərbacanlı tələbələrlə açıq şəraitdə keçən görüşdə komitə sədri əvvəlcə onların təhsili ilə maraqlanıb, onları narahat edən problemləri, suallarını, təkliflərini dinləyib, daha sonra bütün bu problemlərin həlli, təkliflərin həyata keçirilməsi barədə öz fikirlərini bölüşüb, tələbələri maraqlandıran suallara cavab verib. E.İskəndərov bildirib ki, dini təhsil alan tələbələr Azərbaycanın bu sahədə müvafiq qanunlarını bilməlidirlər və bu prosesin milli qanunvericiliyimizə uyğun şəkildə aparılması üçün İran tərəfi ilə məsləhətləşmələr aparılır. Həmçinin tələbələrlə əlaqələrin davamlı saxlanması, onların dini qanunvericiliklə bağlı problemlərinin həllinə yardım məqsədi ilə komitəyə müraciət edə biləcəkləri, bununçün elektron əlaqə mexanizminin yaradılmasının zəruriliyi qeyd olunub. Azərbaycanlı tələbələr görüşə görə təşəkkürlərini bildirərək belə əlaqələrə çox ehtiyacları olduğunu qeyd ediblər.
