Fövqəladə Hallar Nazirliyinin (FHN) 112 - qaynar telefon xəttinə paytaxtın Yasamal rayonunun Ə.Əhmədov küçəsindəki çoxmərtəbəli yaşayış binasında yanğın baş verməsi barədə məlumat daxil olub.
Qurumun mətbuat xidmətindən Modern.az-a bildiriblər ki, məlumatla əlaqədar dərhal FHN-in Dövlət Yanğından Mühafizə Xidmətinin müvafiq qüvvələri çağırış ünvanına cəlb olunub.
Hadisə yerində əməliyyat şəraiti qiymətləndirilərkən məlum olub ki, onaltımərtəbəli yaşayış binasının zirzəmisində fəaliyyət göstərməyən və təmirsiz qeyri-yaşayış obyektində baş vermiş yanğının binanın digər mərtəbələrinə keçmə riski yüksəkdir.
Yanğınsöndürənlərin həyata keçirdikləri operativ və təxirəsalınmaz tədbirlər sayəsində yanğın genişlənməsinə imkan verilmədən qısa müddətdə söndürülüb.
Hadisə nəticəsində zirzəmidə yerləşən ümumi sahəsi 4 kvadratmetr olan gözətçi otağının yanar konstruksiyaları və ümumi sahəsi 120 kvadratmetr olan obyektdə müxtəlif tullantılar yanıb.
Obyekt və mənzillər yanğından mühafizə olunub, xəsarət alan olmayıb. Təhlükəsizlik tədbirləri çərçivəsində sakinlərin təxliyəsi həyata keçirilib.
***
09:08
Paytaxtın Yeni Yasamal yaşayış massivində Əsəd Əhmədov küçəsində yerləşən binada yanğın baş verib.
Daxili İşlər Nazirliyinin mətbuat xidmətindən Modern.az-a bildirilib ki, yanğınla əlaqədar polis əməkdaşları xidmətə çıxarılıb. Ərazidə polis əməkdaşları tərəfindən təhlükəsizlik tədbirləri görülür.
****
Bakıda çoxmərtəbəli yaşayış binası yanır.
Modern.az xəbər verir ki, hadisə Yeni Yasamal yaşayış massivində Əsəd Əhmədov küçəsində yerləşən binada qeydə alınıb.
Yanğın 21 mərtəbəli binanın zirzəmisindən başlayıb və yuxarı mərtəbələrə keçib.
Hadisə yerinə Fövqəladə Hallar Nazirliyinin Dövlət Yanğından mühafizə xidmətinin canlı qüvvəsi və texnikası cəlb olunub. Yanğının söndürülməsi istiqamətində tədbirlər görülür.
