Azərbaycan və İran arasında Rəşt-Astara dəmir yolu dəhlizinin tikintisinə 2024-cü ildə başlanacaq.
Modern.az xəbər verir ki, bu barədə İranın yollar və şəhərsalma naziri Şəhriyar Əfəndizadə “Mehr” agentliyinə bildirib.
“Əldə olunmuş razılaşmaya əsasən, ümid edirik ki, bu layihənin icrasına 2024-cü ilin əvvəlində başlanacaq”, - nazir deyib.
Əfəndizadə qeyd edib ki, 162 km uzunluğunda olan Rəşt-Astara dəmir yolu hazırda İranın ən mühüm dəmir yolu layihəsidir. Bu, İran, Azərbaycan və Rusiya dəmir yollarını birləşdirməli olan Astara-Rəşt-Qəzvin dəmir yolu dəhlizinin bir hissəsidir. Layihə həm də Şimal-Cənub magistralının bir hissəsidir.
Xatırladaq ki, 2023-cü ilin mayında Moskva və Tehran arasında İran ərazisində yerləşən Rəşt-Astara dəmir yolu hissəsinin tamamlanması ilə bağlı sənədlər imzalanıb.
