Qazaxıstanda mart ayında başlayan kütləvi daşqınlar respublikada son 80 ildə ən böyük təbii fəlakətə çevrilib.
Modern.az "Kommersant"a istinadən xəbər verir ki, bunu prezident Kasım-Jomart Tokayev bildirib.
Ölkənin 10 rayonunda - Abay, Akmola, Aktobe, Atırau, Qərbi Qazaxıstan, Qaraqanda, Kostanay, Pavlodar, Şimali Qazaxıstan və Ulıtau vilayətlərində fövqəladə vəziyyət elan edilib.
Tokayev söyləyib ki, respublikada vəziyyəti tənzimləmək üçün Baş nazirin rəhbərlik etdiyi qərargah yaradılıb və o, müavinləri ilə birlikdə zərər çəkmiş rayonlara səfər edir: “Təbii fəlakət baş verdi, onun bənzərləri uzun illərdir görünməyib. Ola bilsin ki, bu, miqyasına və nəticələrinə görə son 80 il ərzində ən böyük fəlakətdir”.
Qazaxıstan Fövqəladə Hallar Nazirliyinin məlumatına görə, Akmola, Aktobe, Atırau, Kostanay, Pavlodar və Şimali Qazaxıstan vilayətlərində 3 mindən çox fərdi yaşayış binası və həyətyanı sahələr su altında qalıb. 46 mindən çox insan xilas edilib və təxliyə edilib. Xilasetmə əməliyyatlarına 8,6 mindən çox insan və 1,7 min texnika, o cümlədən 10 təyyarə cəlb olunub.
Rusiyanın Qazaxıstanla həmsərhəd bölgələrində, xüsusən Altay diyarı, Orenburq və Çelyabinsk vilayətlərində də daşqınla bağlı vəziyyət daha da mürəkkəbləşib.
