Hər gün sülh müqaviləsi imzalamaq üçün əla fürsətdir.
Modern.az xəbər verir ki, bunu Ermənistanın Baş naziri Nikol Paşinyan jurnalistlərə bildirib.
Paşinyanın sözlərinə görə, problem ondadır ki, sülh müqaviləsinin mətni ilə bağlı hələ də razılıq yoxdur, lakin o, buna nail olacağına ümid edir.
“Daha doğrusu, bu razılaşmalar əldə olunub, onlar həm də sazişin mətnində təkrarlanmalıdır və hesab edirəm ki, bizim bu işi ən qısa zamanda başa çatdırmaq imkanımız var”, - Paşinyan bildirib.
Sülh müqaviləsinin harda imzalanacağına gəlincə, o qeyd edib ki, yer və zaman bundan sonra müzakirə olunacaq başqa məsələdir.
“Mən deyə bilərəm ki, indi ab-havada ciddi dəyişiklik var, lakin bu o demək deyil ki, biz finiş xəttinə çatmışıq, sadəcə imza atmaq qalır, görüləsi xeyli iş var”, - Paşinyan əlavə edib.
O, erməni xalqının milli dəyərləri ilə bağlı təsəvvürlərini belə sıralayıb: dövlətçilik, Ermənistanın müstəqilliyi, suverenlik, vətəndaşlıq, ordu.
“Ordu haqqında təsəvvürümüzün dəyişməsi ilə bağlı açıqlama vermək istəyirəm. Ermənistan Respublikasının orduya müharibə aləti kimi deyil, sülh aləti kimi ehtiyacı var”.
Paşinyan təsəvvürlərini sadalamağa davam edib: erməni tarixi, erməni xalqının folkloru - dastanı, inancları, əfsanələri, erməni dili, ədəbiyyatı, biliyi, elmi, ümumerməni potensialı - erməni diasporu, vətəni, ailəsi, şəxsiyyəti.
“Biz insana qiymət verməyi bacarmalıyıq. Küçədə insanın hansı paltarı geyinəcəyinə cəmiyyət qərar verməməlidir, hansı paltarı geyinəcəyinə insan özü qərar verməlidir, bu onun kimliyini, fərdiliyini ifadə edir”.
Paşinyan daha sonra "Erməni Apostol Kilsəsi, Erməni Katolik Kilsəsi, Erməni Yevangelist Kilsəsi, Xristianlıq" deyərək sıralamanı davam etdirib.
Baş nazir bildirib ki, onun hakimiyyətini müəyyən dəyərlərə lazımınca hörmət etməməkdə ittiham edirlər.
“Düşünürəm ki, bu, tamamilə reallığı əks etdirmir. Əgər bəzi qurumlarda kimlərsə öz əməlləri ilə erməni xalqı üçün milli dəyərlərə ziyan vurularsa, mən deməyəcəyəm ki, hökumət buna əhəmiyyət verməsin. Biz tədbir görməliyik, amma bu, hökumətin günahı deyil”.
