Bu gün Horadiz şəhərində Mədəniyyət Sarayında Azərbaycan ədliyyə işçilərinin peşə günü və ədliyyə, məhkəmə orqanlarının 95 illiyi münasibəti ilə tədbir keçirilib. Tədbirdən əvvəl rayon İcra Hakimiyyətinin işçiləri, rayonun hüquq mühafizə orqanlarının rəhbərləri, ictimaiyyət nümayəndələri Heydər Əliyevin abidəsi önünə gül-çiçək dəstələri qoyublar.
Tədbirdə rayon İcra Hakimiyyətinin başçısının birinci müavini Bağır Aslanov ədliyyə, məhkəmə orqanlarının cəmiyyətdəki yeri və rolundan danışıb. Qeyd edib ki, görkəmli şəxsiyyət Heydər Əliyevin tarixi reallığı bərpa edən, milli ədliyyənin demokratik və hüquqi cəmiyyətdə statusu məsələsinə dövlət səviyyəsində münasibət bildirən 10 noyabr 2000-ci il tarixli sərəncamı ilə hər il noyabr ayının 22-si ədliyyə işçilərinin peşə bayramı günü kimi qeyd edilir. Bağır Aslanov rayonun ədliyyə işçilərini peşə bayramı günü münasibətilə təbrik edib, onlara işlərində və xidməti fəaliyyətlərində uğurlar arzulayıb.
