"Mən anamı görmək istəyirəm".
Modern.az xəbər verir ki, bunu "Bild"ə Rusiya və Qərb arasında son mübadilə çərçivəsində azad edilən Kevin Lik deyib.
Tarixi məhbus mübadiləsindən bir gün sonra, 19 yaşlı Kevin Lik hələ də ciblərindən birində Rusiya pasportu ilə həbsxana formasını geyinir. Bu anda əlində olan hər şey budur.
Həm Rusiya, həm də Almaniya vətəndaşı olan Lik 1.5 il Rusiyanın şimalındakı koloniyada qalıb. İndi o, 1990-cı ildə Soyuq Müharibə bitdikdən sonra Qərb və Kreml arasında ən böyük mübadilədə azad edilən 5 Almaniya vətəndaşı arasındadır.
O, məktəb şagirdi olarkən - 17 yaşında “dövlətə xəyanət” ittihamı ilə 4 il həbsə məhkum edilmişdi.
"Birinci gün həbsxana rəisi üzümə dedi ki, mən sizi tanıyıram, ey əclaflar, bundan sonra mənimlə necə davrandığınıza diqqət yetirin", - deyə Lik yadına salıb.
Bundan sonra o, 2 ay təkadamlıq kamerada qalıb. Həbsxanada keçirdiyi çətin günlərə baxmayaraq, Lik müsbət münasibətini qoruduğunu deyir: “Həbsxanada bəzən gülümsəyirdim. Kamera yoldaşlarım məndən nəyə gülə biləcəklərini soruşdular. Mən isə onlara optimist olduğumu söylədim”.
Kevin qeyd edib ki, mübadilədən sonra Köln/Bonn hava limanında Almaniya kansleri Olaf Şoltsla danışa bildikdə, o, kanslerə azad olunacağına dair heç bir fikri olmasa da buna ümidini itirmədiyini deyib.
Kevin azadlığa çıxdığını təsadüfən öyrənib. "Mən həbsxananın yeməkxanasına gedirdim. Onlar mənə dedilər ki, onlarla getməliyəm. Mən əşyalarımı yığa bilmədim. Rusiya xüsusi xidmət orqanlarından 3 nəfər məni təyyarəyə mindirib Moskvaya apardılar. Mübadilə olunduğumu bilmirdim”.
Ondan müsahibə alan müxbir Kevini solğun və yorğun olaraq təsvir edib. Onun çəkisi 70 kiloqram, boyu 192 santimetrdir.
“Mən anamı görmək istəyirəm. O, indi Rusiyadadır, Almaniyaya viza almağa çalışır. Mən onun üçün darıxıram. Sonra 10-cu sinfi bitirib imtahanlarımı vermək istəyirəm”, - Kevin deyib.
Anası Viktoriya Lik Kevin dünyaya gəlməmişdən bir müddət əvvəl alman-rus qarışığı olan əri ilə birlikdə Almaniyaya mühacirət edib. Onun oğlu 2005-ci ildə Reynland-Pfalz əyalətinin Montabaur şəhərində anadan olub. Az sonra Viktoriya Kevinin atasından ayrılıb və uşağı tək böyüdüb. Evinin həsrətini hiss edən Viktoriya Lik 2017-ci ildə Kevinlə Rusiyanın cənubundakı - Şimali Qafqazda yerləşən Adıgey Respublikasının paytaxtı Maykop şəhərinə köçüb.
2023-cü ilin əvvəlində, o zaman 17 yaşlı Kevin Soçidə həbs edilib. 10-cu sinif şagirdi Rusiyadakı hərbi obyektlərin fotosunu çəkib və şəkilləri Almaniyaya göndərməkdə günahlandırılıb. Bununla bağlı heç bir sübut təqdim edilməsə də, Lik 4 il müddətinə azadlıqdan məhrum edilib. Beləliklə, o, Rusiyada vətənə xəyanətdə təqsirli bilinən ən gənc şəxs kimi tarixə düşüb.
