Noyabrın 30-da Ana Vətən Partiyası Ali Məclisinin iclası keçirilib. AVP Mətbuat xidmətindən Modern.az-a bildirilib ki, Ali Məclisin iclasında partiyanın sədri, Milli Məclisin deputatı Fəzail Ağamalı partiyanın 2013-cü ildə qazandığı uğurlardan, Azərbaycanda hüquqi-demokratik dövlət quruculuğunun möhkəmləndirilməsində partiyanın xidmətlərindən, 9 oktyabr prezident seçkilərində partiyanın iştirakından bəhs edib. F.Ağamalı prezident seçkilərində fəal iştiraklarına görə partiya üzvlərinə öz təşəkkürünü bildirib. Daha sonra AVP Mərkəzi Aparatı rəhbərinin məruzəsi dinlənilib. Mərkəzi Aparatın rəhbəri Elçin Ağamalı öz məruzəsində 2013-cü ilin müvafiq dövründə görülmüş işlər barədə ətraflı məlumat verib. Eyni zamanda E.Ağamalı qarşıda duran işlər barədə Ali Məclisin üzvlərinə məlumat verib. Gündəlikdə duran təşkilati məsələlərə baxılaraq AVP Gənclər Təşkilatının sədri Tural Məmmədov Ali Məclisə yeni üzv qəbul olunub. Daha sonra partiya sədri Fəzail Ağamalının təqdimatı ilə Elçin Ağamalı təşkilati məsələlər üzrə, Zülfiyyə Mustafayeva beynəlxalq məsələlər üzrə sədr müavinləri seçiliblər. İclasın sonunda 7 nəfərdən ibarət Mərkəzi Şura seçilib.
Modern.az
