Elektron pul təşkilatlarının sayı 9-a çatdı, onlar nə iş görür? | Modern.az

Mərkəzi Bank tərəfindən “Qoldenpey” ASC-yə elektron pul təşkilatı fəaliyyətini həyata keçirmək hüququ verən lisenziya verilib.

Modern.az Mərkəzi Banka istinadən məlumat verir ki,  “Ödəniş xidmətləri və ödəniş sistemləri haqqında” Azərbaycan Respublikası Qanununa əsasən ödəniş xidmətlərinin göstərilməsi üçün lisenziyanın əldə edilməsinə dair Mərkəzi Banka müraciət etmiş təşkilatların qiymətləndirilməsi işləri çərçivəsində “Qoldenpey” ASC-yə elektron pul təşkilatı fəaliyyətini həyata keçirmək hüququ verən müddətsiz lisenziya təqdim olunub.

Bununla da Azərbaycanda  elektron pul xidməti göstərən təşkilatların sayı 9-a çatıb.  

 

Şirkətin adı	Əmtəə nişanı
“A-Solutions Elektron Pul Təşkilatı” MMC	“Akart”
“United Payment” MMC	"United Payment"
“Modenis” MMC	"eManat"
“PashaPay” MMC	"m10" "MilliÖn"
"Mobile Payment Solutions" MMC	"Portmanat"
"Mpay" QSC	"Mpay"
"Paysis" MMC	"EPUL onlayn ödəniş portalı"
"PulPal" MMC	"PulPal"
"Qoldenpey" ASC	"hesab.az" "GoldenPay"

“Ödəniş xidmətləri və ödəniş sistemləri haqqında” Qanunun 48.1-ci maddəsinə əsasən elektron pul təşkilatı ödəniş xidmətləri sahəsində fəaliyyətini lisenziya aldıqdan sonra həyata keçirə bilərlər.

Elektron pul təşkilatı – Qanunla müəyyən olunmuş qaydada aldığı lisenziya əsasında elektron pulu emissiya və elektron pul ilə əlaqəli ödəniş əməliyyatlarını icra edən, eyni zamanda lisenziyasında nəzərdə tutulduğu halda digər ödəniş xidmətlərini həyata keçirmək hüququ olan hüquqi şəxsdir.
Elektron pul təşkilatları tərəfindən aşağıdakı növ ödəniş xidmətləri göstərilə bilər:

• ödəniş hesabı üzrə pul vəsaitinin nağd formada mədaxili və (və ya) məxarici əməliyyatlarının aparılması;
• kredit köçürməsi, birbaşa debitləşmə, ödəniş kartı və ya digər oxşar ödəniş alətləri ilə ödəniş əməliyyatlarının icrası;
• ödəniş alətlərinin emissiyası və (və ya) ödəniş əməliyyatının ekvayrinqi;
• pul köçürməsi;
• elektron pulun emissiyası və elektron pul ilə ödəniş əməliyyatlarının icrası;
• ödəniş əməliyyatlarının aparılması üçün vasitəçilik xidməti;
• hesab üzrə məlumat xidməti.