“AXCP ilə görüşdə Azərbaycan müxalifətinin birlikdə olması, bir istiqamətdə işlərin davam etdirilməsinə yönəlmiş müzakirələr aparılıb. Bu müzakirələrin davam etdirilməsi məqsədəuyğun sayılıb. Eyni zamanda birgə mitinqlərin, tədbirlərin keçirilməsi dəstəklənib. Bundan sonra irəliyə doğru hərəkət edəcəyik”. Bunu Modern.az-a açıqlamasında Müsavat Partiyası başqanının müavini Gülağa Aslanlı deyib. O, Milli Şurada fəxri sədrlik məsələsində AXCP ilə Müsavat arasında yaranan fikir ayrılığından da danışıb: “Onlar öz fikirlərini söyləyirlər. Biz də öz fikrimizi söyləmişik ki, indiki halda başqa ölkənin vətəndaşı olan şəxsin Milli Şuranın rəhbəri, həmsədri və yaxud da, fəxri sədri olması məqsədəuyğun deyil. Biz öz fikrimizdə qalırıq, amma bu, hələ Milli Şurada qalıb-qalmamaq məsələsinin müzakirəsi anlamına gəlməməlidir”.
