Quba İş Adamlarına Dəstək (QİAD) təşkilatı oktyabrın 25-də sahibkarlarla görüş keçirib.
Modern.az-ın məlumatına görə, Quba şəhərində baş tutan görüşdə Azərbaycanın müxtəlif bölgələrini, həmçinin Quba rayonunu təmsil edən 250-dən çox sahibkar iştirak edib.
Tədbir təşkilatın İdarə Heyətinin sədri Cabbar Heybətovun çıxışı ilə başlayıb, o, iştirakçıları QİAD-ın hədəfləri, məqsədləri, gələcək planları barədə məlumatlandırıb.
Görüşdə Quba Rayon İcra Hakimiyyətinin başçısı İlqar Mahmudov, rayonun deputatı Əlibala Məhərrəmzadə, Türkiyə səfirliyinin ticarət baş müşaviri Yakup Sefer, Kiçik və Orta Biznesin İnkişafı Agentliyinin (KOBİA) İdarə Heyəti sədrinin müavini Samir Hümbətov, Azərbaycan Sahibkarlar Konfederasiyası prezidentinin baş məsləhətçisi Fərid Vəlizadə, “MÜSİAD Azərbaycan” İdarə Heyətinin sədri Rəşad Cabirli və digər şəxslər çıxış ediblər.
Tədbirin əsas məqsədi sahibkarların əlaqələrinin genişləndirilməsi, bölgədə iqtisadi tərəqqinin dəstəklənməsi, regionda sahibkarlığın inkişafına töhfə vermək, ticarətin artırılması, investisiyaların cəlb olunmasıdır.
