İçərişəhərə nəqliyyat vasitələrinin giriş-çıxışında məhdudiyyətlər tətbiq edilməyə başlanılıb. Uzun illərdir gözlənilən bu qərarın qəbul edilməsi həm ictimaiyyət nümayəndələrini, həm də İçərişəhərin yerli sakinlərini məmnun edib.
İçərişəhərdən olan görkəmli bəstəkar Eldar Mansurov Modern.az-a açıqlamasında deyib ki, bu təcrübə dünyanın çox yerində mövcuddur: “Məsələn Baltikyanı ölkələrdə də belədir. Həmin ölkələrin tarixi şəhərlərində də bütün yollar piyada zonası edilib. Bu məncə normal bir şeydir”.
Qadağa bütünlüklə İçərişəhərə giriş-çıxışı əhatə etmir: “Burada fəaliyyət göstərən səfirliklər və əhali üçün yol açıqdır. Mənə elə gəlir ki, insanların taksi ilə gəlib-gedə bilməsi üçün də müəyyən addımlar atılmalıdır. Bu kimi hallarda taksilərin girişinə 5-10 dəqiqə vaxt verilməlidir. Məncə bu məsələ ilə bağlı da bir yol tapılacaq”.
