Fövqəladə Hallar Nazirliyi Bakı şəhəri, Qaradağ rayonunundakı “Binə” Ticarət Mərkəzində ötən gecə baş vermiş yanğınla bağlı məlumat yayıb. Bildirilib ki, hadisə yerinə Fövqəladə Hallar Nazirliyinin yanğınsöndürən və xilasediciləri cəlb olunub. Ticarət Mərkəzinin 4-cü və 5-cı sıralarında hər birinin sahəsi 40 kv. m olan 45 ədəd müxtəlif geyim və paltar satışı mağazalarının plastik materiallardan ibarət arakəsmələri, dam örtükləri və içərisindəki mallar 1800 kv. m sahədə yanıb. Yanğından ticarət mərkəzinin qalan hissəsi mühafizə olunub. Nazirliyin xilasetmə qüvvələri tərəfindən müvafiq təhlükəsizlik tədbirləri həyata keçirilib. Yanğın saat 02:25-də yanğınsöndürənlər tərəfindən söndürülüb.
