“Deyilənlər hamısı yalandır. Yuxarı təşkilatlara, lazımi nazirliklərin hamısına müraciət ünvanlamışıq, onları xəbərdar etmişik ki, Qafqaz Universiteti haqqında şər, böhtan xarakterli material dərc ediblər”. Bunu Modern.az-a Qafqaz Universitetinin mətbuat katibi Ceyhun Vəliyev deyib. “Müraciətimizdən sonra həmin yazıları saytdan çıxartdılar. Hər hansı bir qurumun nüfuzuna xələl gətirərək, onu təhqir edərək özünə reytinq qazanmaq doğru deyil.”
Qeyd edək ki, Qafqaz Universitetində Türkiyənin baş naziri Rəcəb Tayib Ərdoğanın əleyhinə tədbir keçirildiyi barədə bir neçə saytda xəbər gedib. Həmin məlumatlara görə, Qafqaz Universitetində tələbələri akt zalına toplanaraq Fətullah Gülənin video müraciətinə baxmağı vadar edilib. Yığıncaqda R.T. Ərdoğana qarşı sərt ifadələr səsləndirilib.
Gülşən Raufqızı
