Qəzada yaralanan və vəziyyəti ağır olan 3 nəfər Aktau şəhərində xəstəxanada süni tənəffüs aparatına qoşulub.
Modern.az xəbər verir ki, bunu jurnalistlərə açıqlamasında səhiyyə nazirinin müavini İlqar Qasımov deyib.
“Onların stabilləşməsi üçün müalicə davam edir. Vəziyyətləri sabitləşdikdən sonra onlar da Azərbaycana gətiriləcək,” – deyə nazir müavini qeyd edib.
İ.Qasımov bildirib ki, yaralılardan bəzilərində kəllə-beyin travmaları və yüksək hündürlükdən yıxılma nəticəsində ağır zədələr müşahidə olunub.
Onun sözlərinə görə, bütün yaralılar tam müayinə olunacaq, stabillik müəyyən edildikdən sonra ambulator müalicə nəzərdə tutulur.
İlqar Qasımov vurğulayıb ki, müştərək travmaların müalicəsi üçün müxtəlif ixtisaslardan olan mütəxəssislərin birgə iştirakı zəruridir. Lazım olduqda, universitet klinikalarından da əlavə dəstək alınacaq.
Bildirilib ki, qəzada xəsarət alanların müalicəsi ilə bağlı bütün lazımi tədbirlər görülür. “Vətəndaşlarımızı mütəmadi olaraq məlumatlandıracağıq. Xahiş edirəm, bu çətin vaxtda səbirli olun,” – deyə İlqar Qasımov əlavə edib.
