Çox qəribədir, İlyas İsmayılov itkisi heç bir itkiyə bənzəmir.
Doğmanımı itirmisən, dostunumu itirmisən, o deyil, tanıdığın adamımı itirmisən, o da deyil.
Bəs, nədir bu?
İlyas İsmayılovun vəfat xəbəri adamı dəlib keçir. Çox qiymətli, dəyərli varlıq itirmisən kimi hisslər sənə hakim kəsilir. Bir anlıq boşluqda qalırsan.
Həyatdır, hər kəs bir gün gedəcək, ömrünü yaşamışdı, kəlmələrini dilə gətirə bilmirsən. Özündən asılı deyil.
Bu xəbəri bir nazir, baş prokuror, deputatın ölümü kimi qəbul edə bilmirsən. Bu da özündən asılı deyil.
İlyas İsmayılov itkisi adama uşaqlıq illərini xatırladır. Sanki uşaqlıqdan tanımısan İlyas İsmayılovu. Hətta düşünürsən ki, o, sənin uşaqlıq dostun olub.
Niyə belə düşünürsən, axı…
Sualın cavabını tapırsan. İlyas İsmayılovda uşaq səmimiliyi vardı.
İlyas İsmayılov itkisi adamın gözündə ulu babalarını canlandırır. Elə bilirsən ki, o, sənin ulu baban olub. Düşünürsən ki, o, sənə hardasa yol göstərən olub.
Niyə belə düşünürsən, axı…
Sualın cavabını tapırsan. İlyas İsmayılovda dürüstlük, obyektivlik, gözütoxluq, ağayanalıq xarakteri vardı.
İlyas İsmayılov itkisi…
O, alına, satıla bilməyən, maddi dəyərlə ölçülə bilməyən varlıq olub.
Niyə belə düşünürsən, axı…
Sualın cavabını tapırsan, mənəvi dəyər, mənəviyyat onun üçün bütün dəyərlərdən üst idi.
Çox qəribədir, İlyas İsmayılov itkisi heç bir itkiyə bənzəmir.
Doğmanımı itirmisən, dostunumu itirmisən, o deyil, tanıdığın adamımı itirmisən, o da deyil, bəs, nədir bu?
Sualların cavabını tapırsan.
Bu itki səmimiyyəti, dürüstlüyü, obyektivliyi, gözütoxluğu, ağayanalığı, mənəvi dəyərləri özündə cəmləşdirən BİR ŞƏXSİYYƏT İTKİSİDİR.
Sağlığında rəhmət qazanmış adam, ruhun şad olsun!
