Türkiyənin məşhur rəssamı Binnur Ərsayın yaradıcılığına həsr edilmiş “Vətən Türk Qadının Gözü ilə” adlı rəsm sərgisi keçirilib.
Modern.az xəbər verir ki, sərgidə 200 rəsm əsəri təqdim olunub.
Rəssamın sayca 20-ci sərgisi Qarabağda qazanılan qələbədən sonra qürurumuzu, insanların azad və xoşbəxtliyini əks etdirmək məqsədi daşıyır.
Sərgidə təqdim olunan əsərlərdən “Dəmir Yumruq”, “Atlar”, “Şahinlər” tabloları iştirakçılar tərəfindən maraqla qarşılanıb.
Vətən Müharibəsindən öncə Azərbaycan xalqınını kədərini, qayğılı günlərini, hayqırışlarını göstərən və Zəfərdən sonra “Dəmir yumruq” imzasını ehtiva edən tablo əsərlər arasında xüsusi yer tutur.
Rəssam Binnur Ərsay “Şahinlər” seriyalı əsərlərinin azadlığı ifadə etdiyini bildirib, Beynəlxalq Qadınlar günü münasibətilə “Qadın və Kişi bir olarkən güclüdür” ideyasına əsaslanan əsərlərindən söz açıb.
Binnur Ərsay növbəti sərgilərində Təbriz və Cənubi Azərbaycanla bağlı rəsm tablolarını təqdim edəcəyini və planları arasında azad Qarabağ torpağında da bu cür sərgilərin təşkil olunacağını qeyd edib.
Sərgidə parlamentin deputatları və ictimai xadimlər iştirak ediblər. Sərgidə çıxış edən qonaqlar sözügedən sərginin mədəniyyətimiz üçün önəmli olduğunu bildiriblər.
