Türkiyə rəhbərliyi terrorçu Kürdüstan Fəhlə Partiyasının (PKK) lideri Abdulla Öcalanın “silahları buraxın!” çağırışına tabe olmayacaq qruplaşmalara qarşı hərbi əməliyyatlar planı hazırlayır.
Modern.az xəbər verir ki, bu barədə hökumətyönlü “Hürriyet” qəzeti öz mənbələrinə istinadən yazıb.
PKK Mərmərə dənizindəki İmralı adasında ömürlük həbs cəzası çəkən lideri Abdullah Öcalanın çağırışına cavab olaraq şənbə günü Türkiyə ilə atəşkəs elan edib.
Eyni zamanda, PKK özünün ləğvi məsələsini müzakirə edəcəyi qurultay çağırmağa hazır olduğunu, ancaq bunun Öcalanın şəxsi iştirakı ilə mümkünlüyünü bəyan edib. Öcalan bundan əvvəl terrorçuları qurultay çağırmağa və onun nəticələrindən sonra PKK-nın özünü ləğv etdiyini və bölmələrinin tərksilah olunduğunu elan etməyə çağırmışdı.
PKK rəhbərliyi vurğulayıb ki, atəşkəs heç kim onun birləşmələrinə hücum etməyəcəyi müddətdə qüvvədədir.
Türkiyə prezidenti Rəcəb Tayyib Ərdoğan PKK-nın hiyləgərliyə əl atacağı və ya prosesi dayandıracağı təqdirdə terrorçulara qarşı əməliyyatları bərpa edəcəyi ilə hədələyib.
Nəşrin məlumatına görə, PKK-nın tərksilah edilməsi prosesi üçün son tarixlər müəyyən edilib və “yol xəritəsi” dəqiqləşdirilib.
“İki-üç ay ərzində monitorinq aparılacaq. Qəndilin (PKK-nın əsas düşərgəsi hesab olunan İraqdakı Qəndil dağları- red.) silahı yerə qoymağa qərar verməsi halında yaradılacaq mexanizmlər müəyyən ediləcək. PKK silahı yerə qoymağa qərar verəndə təşkilat liderlərinin aqibəti necə olacaq? Silahlar hansı ölkəyə və hara çatdırılacaq? Bunun üçün mexanizmlər yaradılacaq. Silahlar Türkiyədəki müvafiq qurumlara, Türkiyə və İraq administrasiyasının nəzarəti altında İraqdakı müvafiq qurumlara, eləcə də Suriya və Türkiyənin nəzarəti altında olan Suriyadakı təyinatlı yerlərə təhvil veriləcək”, - qəzet qeyd edib.
