“AXCP ilə Müsavat Partiyası arasında hər hansı həll olunmaz problem yoxdur. AXCP-nin əsas hədəfi mövcud hakimiyyətdir”. Bunu Modern.az saytına AXCP sədrinin müavini Fuad Qəhrəmanlı deyib. O, Müsavat başqanı İsa Qəmbərin müraciətinə münasibət bildirərkən qeyd edib ki, proseslərlə bağlı fikirlər səsləndirilib:
“Bu məsələlər AXCP üçün vaxtı keçmiş, əhəmiyyətini itirmiş məqamlardır. AXCP artıq qalmaqallarla bağlı məsələyə yer ayırmır. Bizim əsas hədəfimiz, diqqətimiz Milli Şuranın bütövlüyünün qorunub saxlanması və mövcud hakimiyyətə qarşı demokratik potensialın sərf olunmasıdır. Kimlər ki, vaxtaşırı hakimiyyətin ssenarilərində yer alıb, onlar barəsində vaxtında münasibət bildirilib. Bunlar olub bitmiş mərhələdir”.
Qeyd edək ki, Müsavat başqanı İsa Qəmbər Məhəmməd Əmin Rəsulzadənin yubileyi ilə bağlı tədbirlər keçilən günlərdə hər iki tərəfə səslənərək qalmaqallar yaratmamağa çağırıb.
Aqşin Kərimov
