“Siyasi partiyaların əsas vəzifəsi seçkilərə hazırlaşmaqdır. Biz həm ölkədəki siyasi vəziyyəti, həm də partiya strukturlarında durumu araşdırırıq. Bələdiyyə seçkilərində iştirak edib-etməməklə bağlı qərarımız bu araşdırma başa çatdıqdan sonra məlum olacaq”.
Bunu Modern.az-a Müsavat Partiyası Mərkəzi İcra Aparatının rəhbəri Arif Hacılı deyib. O, Müsavatın parlament seçkiləri ilə bağlı qərar vermədiyini bildirib: “Parlament seçkilərinə hələ bir müddət var. Bu seçkidə ölkədəki siyasi vəziyyət dəyişə bilər. Düşünürəm ki, parlament seçkiləri ilə bağlı qərar qəbul etmək hələ tezdir”.
A.Hacılı Müsavatın siyasi partiyalara təklif etdiyi əməkdaşlıq və müttəfiqlik sazişinin nəticəsindən də danışıb: “Müsavat Azərbaycanda fəaliyyət göstərən siyasi partiyalarla funksional əməkdaşlıq və müttəfiqlik münasibətləri qurmağa hazırdır. Bu məsələlərlə bağlı onlara müraciət etmişik. Bəziləri bu cavabı ertələyiblər, konkret olaraq, Azərbaycan Xalq Cəbhəsi Partiyası müttəfiqliklə bağlı təklifimizi rədd edib”.
İlkin
