“Ermənistan və Azərbaycan nəhayət sülh sazişi layihəsinin mətni üzrə razılığa gələ biliblər və o, imzalanmağa tam hazırdır. Mən deyərdim ki, bu, tarixi hadisədir, görünməmiş bir şeydir”.
Modern.az xəbər verir ki, bunu, Ermənistanın xarici işlər naziri Ararat Mirzoyan Türkiyə mətbuatına müsahibəsində deyib.
Onun sözlərinə görə, 17 maddədən ibarət olan sülh sazişi layihəsinin razılaşdırılması kifayət qədər böyük nailiyyətdir.
“Təsəvvür edin: Ermənistan və Azərbaycan uzun sürən münaqişədən, regionumuzda qan töküləndən sonra bunu bacardı, mətnlə bağlı razılığa gələ bildik. Biz təklif etdik ki, imzalanma mərasiminin yeri və tarixini müəyyən etmək üçün azərbaycanlı tərəfdaşlarımızla dərhal məsləhətləşmələrə başlasın. Lakin təəssüflə qeyd edirik ki, Azərbaycanda məsələyə bir qədər fərqli yanaşma var. Onlar hesab edirlər ki, Ermənistan sazişin imzalanmasının mümkün olması üçün bəzi əlavə addımlar atmalıdır.
Məsələn, ATƏT-in Minsk qrupunun buraxılması məsələsi qeyd olunur. Bizim mövqeyimiz ondan ibarətdir ki, ATƏT-in Minsk qrupunun buraxılması prosesinə başlamağa, təşəbbüs göstərməyə tam hazırıq. Bizim təsəvvürümüz belədir ki, artıq münaqişə yoxdursa və Minsk Qrupu məhz münaqişə üçün yaradılıbsa, o zaman həmin qrupun mövcudluğuna ehtiyac da aradan qalxır. Ancaq biz münaqişənin institusional şəkildə sona çatmasını təmin etməliyik ki, bu da sülh müqaviləsinin imzalanması və ratifikasiyası olardı. Ona görə də biz azərbaycanlı tərəfdaşlarımıza təklif etdik ki, eyni gündə iki sənəd imzalansın: birincisi, ölkələrimiz arasında sülh müqaviləsi, sonra isə Minsk Qrupunun buraxılması prosesinə başlamağa hazır olmağımızla bağlı ATƏT-in müvafiq katibliyinə birgə müraciət”.
Mirzoyan Azərbaycan tərəfinin ikinci şərtindən - Ermənistan Respublikasının Konstitusiyasına dəyişiklik tələbindən də danışıb.
“Rəsmi Bakı deyir ki, Konstitusiyamızda, onun preambulasında İstiqlal Bəyannaməmizə istinad bizim Azərbaycanın ərazi bütövlüyünə ərazi iddiamız deməkdir, bu, doğru deyil”.
Mirzoyanın fikirncə problemi həll etməyin ən qısa yolu sülh müqaviləsini imzalamaq və ratifikasiya etməkdir.
Nazir deyib ki, iki ölkə arasında davam etdiriləcək delimitasiya zamanı sərhədlər Sovet İttifaqının dağılması zamanı mövcud olan sərhədlər olmalıdır.
“Dünyada bütün mümkün suallara cavab verəcək sülh sazişi yoxdur. Əgər iki cəmiyyət arasında düşmənçilik və qarşıdurma varsa, bir sənədlə hər şeyi həll edə bilməzlər. Sülh sazişi ikitərəfli mexanizmin - komissiyanın yaradılmasını nəzərdə tutur ki, bu mexanizm sazişin icrasına nəzarət edəcək, həmçinin proses zamanı qeydə alına biləcək və çox güman ki, bütün mümkün çətinliklər və qanun pozuntuları ilə məşğul olacaq. Başqa sözlə, biz bu problemləri idarə etmək üçün alətlər dəsti hazırlayırıq. Ona görə də sülh müqaviləsi imzalanmazdan əvvəl bütün mümkün məsələlərin həll edilməsi gözləntisi, fikrimizcə, nə ədalətli, nə də realdır”, - Mirzoyan vurğulayıb.
