Dünyanın diqqəti dünəndən Vatikana yönəlib - Roma Papası Fransiskin ölümü böyük kədər və ehtiramla qarşılanıb. Müxtəlif ölkələrin siyasi və dini liderləri Müqəddəs Taxt-Taca ünvanladıqları təziyə mesajlarında 88 yaşlı pontifikin ölümündən kədərləndiklərini bildirir, onun insanlıq, sülh və ədalət sahəsindəki xidmətlərini yüksək qiymətləndirirlər.
Papa Fransisk dünyanın bir sıra ölkələrində rəsmi səfərdə olub. O cümlədən də Azərbaycanda... 2016-cı il oktyabrın 2-də Azərbaycana səfəri çərçivəsində Bakıdakı Katolik Kilsəsində ölkəmizdəki katolik icmasının üzvləri ilə görüşmüşdü.
Modern.az saytının “Bir şəklin tarixçəsi” rubrikasında təqdim etdiyi bu foto da Roma Papası Fransisklə bağlıdır. Amma fotoşəkil Bakıda deyil, Vatikanda çəkilib.
Zaman 13 yanvar 2022-ci il, məkan Vatikan... Qafqaz Müsəlmanları İdarəsinin (QMİ) sədri şeyxülislam Allahşükür Paşazadənin rəhbərlik etdiyi nümayəndə heyəti Müqəddəs Taxt-Tacın rəsmi dəvəti ilə səfərdədir.
Roma Papası pandemiya qadağalarından sonra ilk rəsmi görüşünü QMİ sədri Şeyxülislam Allahşükür Paşazadə və onun rəhbərlik etdiyi nümayəndə heyəti ilə keçirir.
Şeyx həzrətləri Roma Katolik Kilsəsinin rəhbərilə görüşərək Azərbaycan Respublikasının Prezidenti İlham Əliyevin salamlarını çatdırır. Roma Katolik Kilsəsinin rəhbəri də, öz növbəsində, QMİ sədrindən onun salamlarını Azərbaycan Prezidenti İlham Əliyevə çatdırmağı xahiş edir.
Şeyxülislam Allahşükür Paşazadə Papa Fransiskin dünyada sülh və ümumbəşər qardaşlıq uğrunda apardığı ardıcıl fəaliyyətini yüksək dəyərləndirdiyini və onun fəaliyyətini yaxından rəğbətlə izlədiyini deyib.
Bu görüşdə QMİ sədri erməni tərəfinin II Qarabağ müharibəsindən sonra bəzi təhrif olunmuş məlumatlar yaydığını da Papa Fransiskin diqqətinə çatdırır və Azərbaycandakı real vəziyyətlə yerində tanış olmaq üçün Vatikanın nümayəndə heyətini ölkəmizə səfərə dəvət edir.
Fransisk 2013-cü ildən bəri Roma Katolik Kilsəsinə rəhbərlik edirdi və ilk Latın amerikalı papa olaraq tarixə düşüb. Onun liderliyi dövründə kilsə daxilində islahatlar, sosial ədalət təşəbbüsləri və ətraf mühitin qorunması sahəsində fəallıq ön planda olub. Eyni zamanda, o, dialoq və sülh təşəbbüsləri ilə də tanınırdı.
Yeri gəlmişkən, Roma Papası Fransisk ölümündən bir gün əvvəl Pasxa mesajında Azərbaycan və Ermənistanı qısa zamanda sülh razılaşmasına nail olmağa çağırmışdı...
A.Qorxmaz
