Əsgəran-Xocalı yolunda 7 mülki itkin şəxsə aid meyit qalıqları tapılıb.
Əsir və itkin düşmüş, girov götürülmüş vətəndaşlarla əlaqədar Dövlət Komissiyası İşçi qrupu rəhbərinin müavini Eldar Səmədovun sözlərinə görə, aprel ayında aparılan qazıntılar zamanı iki kütləvi məzarlıq aşkarlanıb:
"Əsgəran-Xocalı yolunun üstündə aşkarlanan bu məzarlıqda ən azı 7 itkin şəhidə aid meyit qalıqları aşkarlanıb. Mütəxəssislərin rəyinə görə, qalıqlar mülki şəxslərə aiddir. Onlar qeyri-ənənəvi yolla dəfn olunublar".
Modern.az-a açıqlamasında Milli Məclisin Xocalıdan olan deputatı Elman Məmmədov bildirib ki, hələ daha çox kütləvi məzarlıqlar aşkarlanacaq:
“Ərazilərimiz işğaldan azad olunandan sonra orada aparılan axtarışlar, eləcə də bərpa-quruculuq işləri zamanı müxtəlif ərazilərdə kütləvi məzarlıqlar aşkar olunur. Hesab edirəm ki, belə məzarlıqların sayı çoxalacaq. Təkcə Xocalı soyqırımı nəticəsində taleyi məlum olmayan, itkin hesab olunan 200 nəfərdən çox idi. 190 nəfərin aqibəti hələ də məlum deyil. Xocalı ərazisində aşkarlanan kütləvi məzarlıq bərpa-tikinti zamanı üzə çıxıb. Yəni bu proseslər hələ gedəcək, axtarışlar olacaq. Kütləvi məzarlıqlar beynəlxalq aləmdə erməni vəhşiliyinin, qəddarlığının və bəşəriyyətə, insanlığa qarşı hansı əməllər törətdiklərinin sübutlardır”.
Deputat vurğulayıb ki, meyit qalıqlarının kimə məxsus olduğunu müəyyənləşdirmək olduqca çətindir:
"Bu, birbaşa Dövlət Komissiyasının nəzarətindədir. Xocalı sakini kimi məlumat olaraq deyirəm ki, bu günə qədər taleyi məlum olmayan, itkin hesab olunanların hər birinin ailələrindən, qohum-əqrabalarından qan, DNT azanlizləri götürülüb. İndi kimlikləri xüsusi qurum müəyyənləşdirir. Təkcə Xocalı deyil, ümumilikdə bütün rayonlarımızla bağlı çox çətin prosesdir. Mən bir dəfə bununla bağlı maraqlanmışam. Bəzən bir sutka ərzində bir nəfərin kimliyini ya müəyyən edə bilirlər, ya da yox. 30 il bundan qabaq olmuş hadisədir və itkin sayı da çoxdur. Buna görə proses çətin aparılır. Dövlətimiz xüsusi diqqətini göstərir. Müəyyənləşmə olan kimi, həmin ailəyə və rayonun rəhbərliyinə məlumat verilir".
