Mayın 30-da Rusiyanın Şimali Osetiya bölgəsində yerləşən Dzuarikau–Arxon avtomobil yolunda ağır yol-nəqliyyat hadisəsi baş verib.
Modern.az bu barədə Rusiya Daxili İşlər Nazirliyinə istinadən xəbər verir.
Bildirilib ki, saat 14:00 radələrində baş verən qəzada 19 yaşlı sürücünün idarə etdiyi “Lada Priora” markalı avtomobil qarşı hərəkət zolağına çıxaraq “VAZ 21053” markalı nəqliyyat vasitəsi ilə toqquşub.
“Priora” markalı avtomobilin sürücüsünün 2006-cı il təvəllüdlü, digər avtomobilin sürücüsünün isə 1992-ci il təvəllüdlü olduğu qeyd edilib.
Qəza nəticəsində 5 nəfər hadisə yerində ölüb, daha iki nəfər isə xəstəxanaya yerləşdirilib. Ölənlərdən 3 nəfərin Azərbaycan vətəndaşı olduğu bildirilir. Onların şəxsiyyəti dəqiqləşdirilir.
Hazırda hadisə ilə bağlı araşdırma aparılır.
Qeyd edək ki, "Oxu.az"ın məlumatına görə, dünyasını dəyişən azərbaycanlılardan ikisi Qazax, 1 nəfər isə Ağstafa rayon sakinidir.
Qazax rayonunun Daş Salahlı kənd sakinləri - 2005-ci il təvəllüdlü Köçər Hüseynov və 1993-cü il təvəllüdlü Pərvin Yusifov bir neçə ay öncə Rusiyaya işləmək üçün gediblərmiş.
Qəzada ölən üçüncü azərbaycanlı Ağstafa rayonunun Muğanlı kənd sakini, 2000-ci il təvəllüdlü Ceyhun Arif oğlu Məmmədovdur.
