Ukrayna prezidenti Viktor Yanukoviçin bu gün yerli vaxtla saat 11:00-a təyin olunan görüşü baş tutmayacaq. Modern.az saytı Ukrayna KİV-nə istinadən bildirir ki, bu haqda hakim Regionlar Partiyasındakı mənbə məlumat verib. Xatırladaq ki, fevralın 18-də Ali Radanın sədri Vladimir Rıbak bəyan edib ki, bu gün saat 11:00-da Yanukoviç müxalifət liderləri ilə görüşəcək.
“UDAR” Partiyasının lideri Vitaliy Kliçko və “Batkivşina” fraksiyasının rəhbəri Arseniy Yatsenyuk prezident Yanukoviçlə fevralın 18-dən 19-na keçən gecə görüşüblər. Yanukoviç müxalifət liderlərindən Avropa meydanındakı qarşıdurmaları dayandırılmasına və etirazçıların evlərinə dağılışmasına təkid edib. Eyni zamanda prezident müxalifəti radikallıqdan əl çəkərək danışıqlara başlamağa da çağırıb.
Modern.az
