Nazirlər Kabinetinin alt qruplarda oturmaq üçün ödəniş etmələri ilə əlaqədar tələbələrin narazılığına səbəb olan qərara etiraz edənlərdən biri aksiya iştirakçılarına müraciət ünvanlayıb. Aksiyada iştirak edən BDU tələbəsi Fərəcov Renatın Modern.az saytına daxil olmuş müraciətini olduğu kimi təqdim edirik.
Mən Fərəcov Renat Əziz oğlu BDU-nun Tarix fakültəsinin 3-cü kurs tələbəsiyəm. Bütün dostlarıma və tələbə yoldaşlarıma müraciət edərək aşağıdakı fikirlərimi çatdırmaq istəyirəm.
Bir neçə gün bundan əvvəl “facebook” səhifələrində bəzi tələbələr adından Nazirlər Kabinetinin yeni qərarına etiraz aksiyalarına çağırışla tanış oldum. Çağırış edən tələbəbləri tanımasam da, ailəmin maddi çətinliklərini nəzərə alaraq , aksiyaya qoşulmaq fikirinə düşdüm.
Etiraf edirəm ki, universitetdə oxuduğum müddətdə müəllimlərim və rəhbərlik tərəfindən qayğı və xoş münasibətlə əhatə olunmuşam. Universitet tələbəsi olmaqla fəxr edirəm. Fevral ayının 20-də dərsdən çıxarkən bir qrup tələbənin bir yerə toplaşdığını və hətta bəzi şəxslərin hasarı aşaraq hay-küylə toplaşan kütləyə yaxınlaşdığını gördüm. Bu toplantının yeni qərara etiraz olacağını düşünərək mən də kütləyə qoşuldum. Lakin tanımadığım, sonradan bildiyim kimi universitetin tələbəsi olmayan və ümumiyyətlə heç tələbə olmayan bir qrup şəxsin tamamilə başqa məqsədlərlə hay-küy saldıqlarına başa düşmədən düşünməyərək fəallıq göstərməyə başladım. Lakin bir qədər sonra başa düşdüm ki, bura toplaşanların məqsədi tamam başqadır və bizi maraqlandıran məsələlər onları maraqlandırmır. Ona görə mən 21 fevralda rektorun təyin etdiyi görüşə gəlib məsələnin müzakirəsində iştirak etmək istədim. Həmin görüşdə istər universitet rəhbərliyinin , istərsə də Təhsil Nazirliyinin nümayəndələrinin şərhləri və tələbələrin suallarına verilən dolğun cavablar məni qane etdi. Lakin tədbirin sonunda məsəlinin mahiyyətindən kənar olsa da, mənim oxuduğum tarix fakültəsinin bir tələbəsi universitetdə guya mövcud olan rüşvət hallarına aid təxribatçı sulal verdi. Onun bu sualı zalda olan mənim dünəndən tanıdığım ünsürlər tərəfindən alqışlandı. Mən 3 ildir ki, universitetdə oxuyuram və indiyədək heç bir rüşvət halı ilə üzləşməmişəm, müəllimlərimiz və fakültə rəhbərliyi daim bizə diqqət göstərir və obyektivliyin qorunmasına çalışıblar.
Hesab edirəm ki, bu sual təxribat xarakteri daşımışdı. Və universitetin mövcud olan müsbət imicinə kölgə salmağa yönəlib. Artıq başa düşürəm ki, müəyyən adamlar biz gənclərdən öz çirkin məqsədlərinə nail olmaq üçün istifadə etmək istəyirlər, ona görə mən sizi də belə təxribatlara uymamağa çağırıram.
Modern.az
