“Milli Televiziya və Radio Şurasının bizə göndərdiyi tövsiyə xarakterli məktubu tamamilə haqlı hesab edirəm”. Bunu Modern.az-a ANS-in “Adam içində” verilişinin aparıcısı Elgiz Əkbər proqramın bağlanacağına dair yayılan şayiələrə aydınlıq gətirərkən deyib: “Bizim verilişimiz bağlanmayacaq. Fəaliyyətmizi yenə də davam etdirəcəyik”.
Aparıcı bildirib ki, bundan sonrakı fəaliyyətlərində Mili Teleradio Şurasının bütün tövsiyələri nəzərə alınacaq:
“Onların dedikləri ilə razılaşırıq. Ümumiyyətlə, Nuşirəvan Məhərrəmli televiziya işini çox gözəl bilən bir insandır, ziyalıdır. Hesab edirəm ki, Azərbaycanda televiziya işini ondan yaxşı bilən ikinci bir mütəxəssis yoxdur. Onun hər bir tövsiyəsindən faydalanacağıq. Mən şəxsən öz verilişimdə buna əməl edəcəyəm. Düşünürəm ki, bizim fəaliyyətimizlə bağlı hər hansı bir problem olmayacaq. Daha maraqlı, daha çox zövq oxşayan verilişlərlə tamaşaçıların qarşısına çıxacağıq. İnsanları daha çox maarifləndirmək üçün səfərbər olacağıq. Bundan sonra verilişə dəvət olunan ekspertlərimizin seçiminə daha çox diqqət verəcəyik. Onların daha çox söz sahibi, həm hüquqşunas, həm də dövlət xadimi olmasına önəm ayıracağıq. Düşünürəm ki, bu da insanların hüquqi bilgilərinin artırılmasında daha çox rol oynayacaq”.
Gülşən Raufqızı
