“Erməni kəşfiyyatına işləyən Leyla Yunus və onun kimilərini müdafiə edən qüvvələrlə, o сür şəxslərlə ümumxalq maraqları üçün bir araya gəlmək düzgün deyil. Bundan sonra onlarla bir stol arxasında necə oturub dialoq, müzakirə aparmaq olar?..”.
Bunu Modern.az saytına açıqlamasında YAP icra katibinin müavini, deputat Siyavuş Novruzov Dağlıq Qarabağ münaqişəsinin həlli ilə bağlı iqtidar-müxalifət dialoqunun perspektivini şərh edərkən deyib. Onun sözlərinə görə, ümummilli məsələlərdə iqtidarla müxalifət bir nöqtəyə vurmalı olduğu halda, onlar Leyla Yunusun müdafiəsinə qalxırlar.
YAP rəsmisi onu da bildirib ki, Dağlıq Qarabağ münaqişəsinin həlli istiqamətində Azərbaycan ciddi işlər görür. “Azərbaycanın NATO standartlarına cavab verən qüdrətli ordusu var. Cənubi Qafqaz və MDB məkanında ən yeni hərbi texnikalara malik ölkəyik. Ordu strukturlarında dəyişikliklər aparılır. Azərbaycan ordusu hər zaman işğal altındakı torpaqları azad etməyə qadirdir”.
Hakim partiya funksioneri deyib ki, Ermənistan daxili problemlərini həll etməkdən ötrü Dağlıq Qarabağ münaqişəsi ətrafında təxribatlar həyata keçirməyə çalışır.
“Biz buna görə bir neçə siyasi partiya ilə Qarabağ probleminə dair birgə tədbirlər keçirmişik”,-deyən S. Novruzov Qarabağ məsələsində hamını bir nöqtəyə vurmağa çağırıb.
“Hamı bir olmalıdır, amma bu gün bəzi şəxslər Leyla Yunusun müdafiəsinə qalxırlar”.
Aqşin Kərimov
