Səhiyyə Nazirliyinin Milli Onkologiya Mərkəzinin həkim briqadası iyulun 16-dan 22-dək respublikanın şimal-qərb bölgəsinə daxil olan Balakən, Zaqatala və Qax rayonlarında əhali arasında profilaktik baxış məqsədilə müayinələr aparıb.
Nazirliyin mətbuat xidmətindən Modern.az-a verilən məlumata görə, Səhiyyə Nazirliyinin baş mütəxəssisi, respublikanın baş onkoloqu Azad Kərimli müayinələrin məqsədi və nəticələri barədə məlumat verib. A.Kərimli bildirib ki, aparılan profilaktik baxışlar məqsədli xarakter daşıyır və xərçəng və xərçəngyönümlü xəstəliklərin vaxtında aşkar olunaraq nəzarətə götürülməsi məqsədilə həyata keçirilir.
Baş onkoloq bildirib ki, iyulun 16-dan davam edən aksiya çərçivəsində Balakən rayonunda 1154, Zaqatalada 1010, Qax rayonunda isə 1385 nəfərdə müayinə aparılıb. Müayinələr zamanı xərçəng xəstəliyi ilə yanaşı, digər xəstəliklərin də aşkar olunduğunu nəzərə çatdıran A.Kərimli belə xəstələrin uyğun ixtisaslı həkimlərə yönəldildiyini bildirib.
Onun sözlərinə görə, müayinələr zamanı Balakən rayonunda 76, Zaqatalada 61, Qaxda isə 67 xəstə aşkar olunub. Aşkarlanan xəstəliklərin heç də hamısı xərçəng xəstəliyi ilə bağlı deyildir, yəni ümumi xəstəliklərdir. Müsbət haldır ki, aşkarlanan xəstələr arasında xərçəng xəstəliyinə tutulanlar çox az faiz təşkil edir. Xərçəng xəstəliyinin yerləşməsinə gəldikdə, ümumiyyətlə, bütün dünya üzrə kişilər arasında ağciyər, traxeya, qadınlar arasında isə süd vəzisinin xərçənginə daha çox təsadüf olunur. Ona görə də aksiya zamanı əsas diqqət qadınların müayinəsinə yönəldilib. Belə xəstələrin sayı o qədər də çox olmayıb. Şübhəli bilinən xəstələr əlavə müayinələrin aparılması, müalicə taktikasının seçilməsi üçün Milli Onkologiya Mərkəzinə dəvət ediliblər.
Baş onkoloq sonda 2006-cı ildən mütəmadi olaraq keçirilən bu müayinələrin davamlı olacağını bildirib.
Qeyd edək ki, müayinələr mərkəzin Mobil Diaqnostika Kompleksinin vasitəsilə 18 nəfərdən ibarət yüksək ixtisaslı həkim briqadası tərəfindən həyata keçirilib.
Modern.az
