Azərbaycan Yazıçılar Birliyinin sədri, xalq yazıçısı Anar həm də baməzə adam kimi tanınıb. Bu baməzəlik onun əsərlərindəki gizli replikalarda obrazların dlində də hiss olunur. Həyatda da Anar zaman-zaman yazıçı və şair yoldaşları ilə də zarafatlaşır. Onların bir qismini nəzm şəklində çatdırıb ki, bu da onun külliyatına daxil edilib. Modern.az saytı zarafatla yazılmış həmin şeirləri təqdim edir:
Qabil:
Valideyinə oğulsansa Anar ol!
Sən əbədi məşəl kimi yanar ol,
Ata- ana məzarının üstündə
Bir gül olma gülüstan ol, gülzar ol
Anarın cavabı:
Hər sənətdə, hər peşədə kamil ol,
Tarda Bəhram, kamançada Habil ol,
Ömər Xəyyam çox şairə söylədi:
Hünərin var rübaidə Qabil ol!
Fikrət Qoca Anara yazır:
Anarın qəzəbi gur səsindədir,
Sifəti burnunun kölgəsindədir.
Ağ qoç, qara qoçu minib yorubdu,
İndi də şairlik həvəsindədir.
Anarın cavabı:
Fikrətə çatmaq üçün gənc şairlər əlləşir.
Onlar qocalaşırlar,
Fikrət Qoca gəncləşir.
Anardan Əkrəm Əylisliyə:
Əkrəm, Əkrəm, ay Əkrəm,
Görmüşük neçə kərəm,
Şan-şöhrət bir Əslidir
Sən də ki, yanıq Kərəm.
Vaqif Səmədoğluna:
Buludlər ləçək-ləçək
Vaqulya, doldur içək
Qıl körpüsün keçəndə
Gəl içək sonra keçək.
Ramiz Rövşənə:
Böyük şair olmağa,
Çalışdıq hər birimiz.
Amma anadangəlmə
Böyük şairdi Ramiz!
Kamal Abdullaya:
Gizli Dədə Qorqudun
Sirrini açmaq üçün
Kamal xeyli əlləşdi
İti qələm çaldı o.
Şeirlə nəsr birləşdi
Xətai ikiləşdi.
Zəlimxan Yaquba:
Xiridardır, saza sözə,
Yaddaşı da bir möcüzə.
Sinonimçün sino gedər,
Sinonim çatmasa yüzə
Qələmini yerə qoymaz,
Ürəyi soyumaz, doymaz.
Afaq Məsuda:
Şübhəsiz ki, bu faktdır fakt,
Əsl yazıçıdır Afaq.
Büdcəyə salaq Mərkəzi,
Sevindirək hər kəsi.
“Xəzər” tərcüməylə dolar
Afaq da ki, məsud olar.
Anara, yəni özü-özünə:
Roman yazdı – uzandı
Tənqid yazdı –usandı
Çıxış yazdı-utandı
Şeir yazmaq istədi
Bir gün başa düşdü ki,
Şairlik bir azardı
Hərdən-birdən tutandı.
Hazırladı: Elmin NURİ
