Bu gün Tibb Universitetinin Tədris-cərrahiyyə klinikasında Türk Əməkdaşlıq və Koordinasiya Agentliyi (TİKA) tərəfindən həyata keçirlən “Xoş gəldin körpə” ana və uşaq sağlamlığına dəstək layihəsinin iştirakçılarına sertifikatlar təqdim olunub.
TİKA-nın Bakı ofisinin rəhbəri Mustafa Polat Modern.az-a layihə baradə məlumat verib. Onun sözlərinə görə, bu layihə üzərində 1 ildən artıqdır fəaliyyət davam edir.
“Layihə çərçivəsində təlim proqramları həyata keçirilib. Azərbaycanda ilk dəfə həyata keçirlən layihənin məqsədi, körpə doğulanda ona ilk 2-3 dəqiqədə göstərilən diqqətin, qulluğun önəmininin izah edilməsidir. Belə ki, ilk doğulan zaman körpəyə qarşı olan hər hansı bir yanlışlıqlar onun həyatı boyunca kor, şikəst və digər ağır xəstəliklərə tutulmasına səbəb ola bilər. Bu məqsədlə Dünya Sağlamlıq Təşkilatının təcrübəsindən yararlanan layihədə təlim keçmiş mütəxəssislər öyrəndiklərini həm şəhərlərdə, həm də Azərbaycanın hər bir bölgəsində sadə vətəndaşlara aşılayacaqlar”.
M.Polat qeyd edib ki, layihə daxilində həyata keçirilmiş təlim proqramında 27 həkim, tibb bacısı və mama iştirak edib. Bununla yanaşı, layihəyə 75 nəfər könüllü sadə vətəndaş - analar da cəlb olunub.
O vurğulayıb ki, araşdırmalara baxanda ən çox uşaq ölümlərinə rast gəlinən ölkələr siyahasında Azərbaycanın da adı var.
“ Düzdür, bu, gündən-günə azalsa da, kifayətlənmək olmaz. Türkiyədə bu göstərici mində yeddi faizə endirilib ki, bu, inkişaf etmiş ölkələr üçün normal hesab olunur. Lakin Azərbaycanda da bu göstəriciyə nail olmaq üçün daha çox çalışmaq lazımdır”.
M.Polatın sözlərinə görə, təlim proqramını aparan mütəxəssislər Türkiyədə təcrübə keçiblər. Hazırda təlim proqramında 120 nəfərin iştirak etdiyini deyən M.Polat Tovuz, Gəncə, Qazax və Şəmkir bölgəsindən daha çox maraq olduğunu vurğulayıb.
O qeyd edib ki, 120 nəfərin içərisindən 5-6 nəfər təlimçi kimi seçilib, bölgələrə göndəriləcəklər.
Layihənin proqramında uğur qazanmış tibb bacıları və mamalara layihənin sertifiakatları təqdim olunub.
Qeyd edək ki, layihə Azərbaycan Tibb Universiteti, Gəncliyə Yardım Fondu, Türk Əməkdaşlıq və Koordinasiya Agentliyi, Beynəlxalq Həkimlər İttifaqı, Gənc Ana və Uşaqların Maarifləndirlməsi İctimai Birliyinin təşkilatı dəstəyi ilə həyata keçirilir.
Məltəm Talıbzadə
