“Azərsu” Açıq Səhmdar Cəmiyyəti regionlarda içməli su təchizatının yaxşılaşdırılması tədbirləri çərçivəsində içməli su çatışmazlığının müşahidə olunduğu kəndlərin problemlərinin həllinə xüsusi diqqət yetirir. “Azərbaycan Respublikası regionlarının 2014-2018-cü illərdə sosial-iqtisadi inkişafı Dövlət Proqramı”na uyğun olaraq kənd və qəsəbələrdə əhalinin içməli suya olan tələbatının ödənilməsi məqsədilə layihələrin icrası davam etdirilir.
2014-cü ildə “Azərsu” ASC-nin “Birləşmiş Sukanal” MMC-nin sifarişi ilə 127 km içməli su xətti, 2,6 km uzunluğunda kanalizasiya xətti çəkilmiş və ya dəyişdirilmiş, 5 ədəd subartezian quyusu qazılıb.
Cəbhəyanı bölgədə yerləşən Tovuz rayonunun Əlibəyli kəndində əhalinin içməli su təchizatının yaxşılaşdırılması məqsədi ilə yeni layihə icra edilib. Layihə çərçivəsində subartezian quyusu qazılıb, transformator yarım stansiyası quraşdırılıb, 3,5 km magistral və kənddaxili su xətləri çəkilib, hər birinin tutumu 100 kubmetr olan 2 su anbarı tikilib. Görülmüş işlər nəticəsində 5800 nəfər sakinin içməli su təchizatı yaxşılaşıb.
2014-cü ildə Tərtər şəhərində, həmçinin rayonun Bala Kəngərli kəndində, Füzuli rayonunun Yağlıvənd, Ağcabədi rayonunun Şənlik kəndində də subartezian quyuları qazılıb, magistral və paylayıcı su xətləri çəkilərək istismara verilib. Eyni zamanda Şirvan şəhərinin Yeni Yaşayış massivində 49 kilometr su şəbəkəsi yaradılıb, Şirvan-Muğan kəmərindən əraziyə magistral xətt çəkilib. Hesabat dövründə Balakən, Zaqatala, Qazax, Ağsu, İsmayıllı, Qobustan, Yardımlı, Biləsuvar, Salyan, Saatlı rayonlarının kənd və qəsəbələrində də tikinti-quraşdırma işləri həyata keçirilib.
“Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı” çərçivəsində 2014-cü ildə görülmüş işlər nəticəsində kənd və qəsəbələrdə 35 min nəfərin su təminatı yaxşılaşıbr.
2014-cü ildə Masallı rayonunun Muğanlı zonasında 23 kəndin, Yardımlı rayonunda Osnakəran, Bürzünbül, Vərgədüz, Bilnə kəndlərinin, Quba rayonunun Qəçrəş kəndinin içməli su təchizatının yaxşılaşdırılması məqsədi ilə layihələrin icrası davam etdirilib. Bu kəndlərdə icra olunan layihələr ümumilikdə 31,5 min nəfərin içməli su probleminin həllinə hesablanıb.
Modern.az
