“Həsən Həsənov mətbuatda “bu dedi, o dedi” kimi dedi-qoduların yayılması və işıqlandırılmasını sevmir. İnsanlar arasında konflikt yaranmasını heç istəmir. Bu cür hallar Həsən Həsənovun ümumi iş prinsipinə uyğun deyil”.
Azərbaycanın Polşadakı səfirliyindən səfir Həsən Həsənovla bağlı səslənən ittihamlara cavab olaraq Modern.az-a verilən açıqlamada belə deyilib.
Həsən Həsənovun köməkçisi açıqlamasında bir məsələni xüsusi vurğulayıb.
“Biz belə məsələləri, bu tipdə olan informasiyaları Həsən müəllimə çatdırmaqda çox çətinlik çəkirik. Bəzən rastlaşdığımız bu cür sualları başqalarının adından olsa belə, Həsən müəllimə məruzə etmirik. Çünki Həsən müəllimin necə reaksiya verəcəyini bilirik. Demək olar ki, Həsən müəllim mətbuatda haqqında yazılan yazılara cavab verməyi özünə yasaq edib. Dediyim kimi, Həsən Həsənov konfliktlərdən uzaq insandır. Səsləndirdiyiniz suallara da cavab verməyəcəyini vurğulayıb”.
Qeyd edək ki, Azərbaycanın Polşadakı səfiri Həsən Həsənov Azərbaycanın eks-prezidenti Ayaz Mütəllibovun dövründə baş nazir olub. Digər keçmiş baş nazir Rəhim Hüseynov Moderator.az-a müsahibəsində hazırkı səfir və o zamankı Nazirlər Kabinetinə rəhbərlik etmiş Həsən Həsənov haqda bir sıra ittihamlar səsləndirib.
Namidə BİNGÖL
