Aprelin 24-də Müsavat Partiyası başqanının həbsdəki müavini Tofiq Yaqublu qızı Nərgiz Yaqublunun vəfatı ilə əlaqədar 7 günlük azadlığa buraxılıb.
Bu barədə məlumatı Modern.az saytına vəkil Nemət Kərimli bildirib :”Tofiq bəy artıq buraxılıb. Yoldadır. Evə gəlir”.
Ailə üzvlərindən biri dünyasını dəyişən, yaxud ağır xəstə olan məhbusun müvəqqəti olaraq azadlığa buraxılmasına dair müddəa müvafiq qanunvericilkdə nəzərdə tutulur.
Nərgiz Yaqublu aprelin 23-də səhər saatlarında Rusiyanın Tomsk şəhərində, müalicə olunduğu xəstəxanada vəfat edib.
Nərgiz Yaqublu ötən il ailə qurub, Rusiyada yaşayırdı. Ailə qurmazdan öncə "Yeni Müsavat" qəzetində çalışıb. O, sarılıq xəstəliyindən (Hepatit C) əziyyət çəkirdi və Tomsk şəhərindəki xəstəxanaların birində müalicə alırdı. Mərhum ana olmağa hazırlaşırdı.
Sevinc Yasinqızı
