“Artıq Azərbaycan dövləti və milləti qalibdir. Çünki Azərbaycanı Avropada və dünayada tanıyırlar”. Bunu Modern.az saytına tanınmış şoumen, yazıçı, rəssam və I Avropa Oyunları ərzində çimərlik futbolu üzrə ulduz səfir Bəhram Bağırzadə deyib.
O bildirib ki, ulduz səfir olduğu çimərlik oyunu üzrə lazım olan bütün təbliğat işlərini aparır:
“Bir vətəndaş kimi xoşbəxtəm ki, mənim uşaqlıq arzularım həyata keçir. Belə ki, Azərbaycanda belə möhtəşəm idman yarışları baş tutacaq. Mən də artıq 4 aydır ulduz səfir kimi çalışıram.
Ulduz səfir olduğum idman növünü təbliğ edən saysız-hesabsız roliklərə və reklamlara çəkilmişəm. Çimərlik futbolunun prezidenti Fərid Novruzi, Azərbaycan yığmasının baş məşqçisi Joze Mieql və futbolçularla görüşmüşəm.
Hazırda azarkeşləri oyuna cəlb eləmək və yarışlarda Azərbaycan yığmasını dəstəkləmək üçün hazırlıq gedir. Avstriya və Sloveniyada çimərlik oyununu təbliğ edib müsabiqələr keçirmişəm. Oyunlarla bağlı digər aksiyalarda da iştirak etmişəm. İstəyirik ki, biz qalib gələk.
Bu gün isə çimərlik oyunu üçün tikilən stadiona gedəcəyəm. Çox möhtəşəm stadion tikilib və bütün azarkeşləri ora dəvət edirəm. Ən əsası, məni bir azərbaycanlı olaraq sevindirir ki, ölkəmizdə bu qədər gözəl stadionlar tikilib. Gələcəkdə bizim övladlarımız bu stadionlarda məşq edəcəklər. Gələcəkdə Azərbaycan milləti dünyanın tanınan millətinə çevrilə bilər. Bu, bizim qələbəmizdir. Artıq Azərbaycan dövləti və milləti qalibdir. Çünki Azərbaycanı Avropada və dünyada tanıyırlar”.
Bəhram Bağırzadə qeyd edib ki, övladları ilə birgə yarışları izləyəcək:
“Mən Bakı şəhərində anadan olmuşam. Uşaq vaxtından biz həmişə dəniz kənarında çimərlik futbolu oynamışıq. Sadəcə olaraq braziliyalılar bizdən qabağa düşüb 1992-ci ildə bu oyunu rəsmiləşdiriblər. 1995-ci ildə isə Azərbaycan da bu yarışlara qatıldı.
Əlbəttə, mənə yaxın olan idman növü futboldur. Daxilimdə idmançıyam. Vaxtilə də idmançı olmuşam. KVN üçündə çoxları müqayisə edir ki, bu yaradıcılıqdır, yoxsa idman. Mən həmişə onu idman saymışam. Çünki orada komandaların görüşü, mübarizə və qələbəsi var. Ona görə də mənim üçün hansı idman növü üzrə ulduz səfir seçilməyim fərq etməzdi. Əgər digər idman növü mənə düşsəydi, bilmədiyim müəyyən xırdalıqları öyrənib təbliğ edəcəkdim.
Artıq biletləri əldə etmişəm. Övladlarımı da həmin yarışlara baxmaq üçün aparacağam. Çox istərdim ki, bizim vətəndaşlar da qoy öz övladlarını da yarışlara gətirsinlər”.
İyunun 12-dək 28-dək Bakıda I Avropa Oyunları keçiriləcək. Oyunlarda 49 ölkədən 20 idman növü üzrə 6000-dən çox idmançı yarışacaq.
Sevinc YASİNQIZI
