Siirtin Eruh rayonunun Gedikkaşar kəndində yaşayan Türkiyənin ən yaşlı seçici, 130 yaşlı Mehmet Esen deputat seçkiləri üçün səsvermə hüququndan istifadə edib. Modern.az-ın Türkiyə KİV-nə istinadən verdiyi xəbərə görə, Gedikkaşar kəndində yaşayan Esen nəvələrinin köməyi ilə maşınla evindən götürülərək məntəqəyə aparılıb. Səsvermə kabinəsinə gedən Mehmet Esen, daha sonra prosesi izləyib. Səsvermədən sonra türkcə bilmədiyi üçün kürd dilində açıqlama verən Mehmet Esen Adnan Menderes dövründən bəri bütün seçkilərdə səsvermə hüququndan istifadə etdiyini bildirib.
Çətinliklə ayaq üstə dayanan Mehmet Esen 25-ci müddətə deputatlıq seçkilərinin türk və kürdlərə sülh, əmin-amanlıq və qardaşlıq gətirməsini arzulayıb. Xəstə olmasına baxmayaraq vətəndaşlıq borcunu yerinə yetirdiyini bildirən Esen kürd dilində çıxış edərək deyib: “Ölkəmiz üçün bu seçki çox əhəmiyyətlidir. Kürd probleminin həlli prosesi səbəbindən son bir neçə ildir bölgədə əmin-amanlıq və qardaşlıq hakimdir. İnşallah, pozulmaz və həmişə belə davam edər. Deputat seçkilərinin türk və kürd məkanında yaşayan xalqlara sülh gətirməsini arzu edirəm”.
Türkiyənin ən yaşlı seçicisi sayılan Mehmet Esen daha sonra avtomobillə evinə aparılıb.
Modern.az
