Tələbə Qəbulu üzrə Dövlət Komissiyası (TQDK) iyunun 6-da növbəti SAT imtahanı keçirib. Modern.az xəbər verir ki, imtahan saat 08:30-da başlanıb və 3 saat 45 dəqiqə ərzində aparılıb.
İmtahanda iştirakçılara normal imtahan şəraiti yaradılmış və proses təlimata uyğun aparılıb. Bu imtahanının nəticələri iyun ayının 25-i imtahan verənlərin “College Board”-un internet səhifəsindəki şəxsi hesabında açıqlanmış olacaq.
Növbəti SAT imtahanlarına qeydiyyat iyun ayının 12-dən başlanacaq və onlayn qaydada qeydiyyatdan keçmək üçün ətraflı məlumat //tqdk.gov.az/en/international-partnerships/sat/ linkdə verilib.
Qeyd edək ki, SAT (Scholastic Aptitude Test) müxtəlif siniflərdə təhsil alan məktəb şagirdlərinin oxuma, yazma və riyazi biliklərini yoxlayan standartlaşdırılmış test imtahanıdır və hər il imtahana iki milyondan artıq məktəb məzunu daxil olur.
SAT imtahanının nəticəsi beynəlxalq səviyyədə tanınmaqla, ABŞ-da və dünyanın müxtəlif ölkələrində kollec və universitetlərə qəbul prosesində məktəb məzunlarının ali təhsil almağa hazırlığını qiymətləndirməyə imkan verən obyektiv imtahan göstəricisi kimi qəbul olunur. Ali təhsil ocaqlarının qəbul komissiyaları üçün SAT imtahanının nəticəsi müraciət edən məktəb məzunlarını eyni şkalada müqayisə etməyə imkan verir, həmçinin onlara təqaüd verilməsi qərarlarını müəyyən etməkdə obyektiv mənbə hesab olunur.
Aytən ƏLİYEVA
