Birinci Avropa Oyunlarının məşəli iyunun 12-də keçiriləcək açılış mərasiminə gətirilməzdən əvvəl 5 gün ərzində Bakı şəhərində gəzdiriləcək. Modern.az saytı xəbər verir ki, məşəlin Bakı şəhəri üzrə marşrutu belə olacaq:
İyunun 8-də məşəl Avropa Oyunlarının keçiriləcəyi doqquz məkandan keçəcək. Həmin məkanlara Heydər Əliyev adına İdman və Milli Gimnastika arenaları, “Kristal Zal”, Bakı Su İdmanı Mərkəzi, Bilgəh çimərliyi, Tofiq Bəhramov adına Respublika stadionu, Basketbol arenası, BMX Veloparkı və Dağ Velosiped Veloparkı daxildir.
İyunun 9-da məşəl bir çox tarixi önəmli binalara aparılaraq YUNESCO-nun Dünya Mədəni İrsi siyahısına daxil edilən qədim İçərişəhərə səyahət edəcək. Məşəl YUNESCO-nun Azərbaycan arxitekturasının mirvarilərindən biri kimi adlandırdığı məşhur Şirvanşahlar Sarayında da olacaq.
İyunun 10-da məşəl Bakının mədəniyyət və memarlıq obyektlərinə - Nizami küçəsinə, Fəvvarələr meydanına, Mərkəzi Parka (Qış Parkı), Filarmoniya Parkına və nəhayət, Funikulyorun yuxarı hissəsində yerləşən Dağüstü Parka aparılacaq.
İyunun 11-də məşəl final üçün Qız Qalasından götürüləcək və iyunun 12-də açılış mərasiminin keçiriləcəyi Milli Olimpiya Stadionuna aparılacaq.
Sevinc YASİNQIZI
