Paytaxtın yollarında təcili tibbi yardım, yanğın söndürən və digər xüsusi təyinatlı maşınlar üçün ayrıca hərəkət zolağının yaradılması hazırkı dövr üçün olduqca zəruridir. Ancaq I Avropa Oyunları ilə əlaqədar nəzərdə tutulan xüsusi xətt zolağının salınması onu göstərdi ki, paytaxt Bakıda da belə hərəkət zolağının salınması mümkündür. Görəsən, Avropa Oyunları ilə əlaqədar nəzərdə tutulan “Oyunlar zolağı” yarışlardan sonra xüsusi təyinatlı maşınların hərəkəti üçün saxlanıla bilərmi?
Modern.az saytının sorğusunu Daxili İşlər Nazirliyi Baş Dövlət Yol Polisi İdarəsinin İctimaiyyətlə əlaqələr şöbəsinin rəisi, polis polkovniki Kamran Əliyev cavablandırıb.
O bildirib ki, bu barədə öncədən məlumat vermək, fikir söyləmək tezdir: “Oyunlardan sonra yolun saxlanılıb və ya ləğv olunması ilə bağlı hazırda məlumat yoxdur. Bu, ancaq Nazirlər Kabinetinin Yol Hərəkətinin Təhlükəsizlik Komissiyasının qərar ilə həyata keçirilə bilər. Amma zərurət yaranarsa, müəyyən ərazilərdə saxlanıla bilər.
Nəqliyyatın sıxlığının qarşısının alınması üçün güman etmirəm ki, əksər hissələrdə, xüsusilə də Ziya Bünyadaov prospektində o zolaqlar axıra qədər saxlanılsın. Ancaq bu, Nazirlər Kabinetinin Yol Hərəkətinin Təhlükəsizlik Komissiyasının səlahiyyətinə aid olan məsələdir. Bununla bağlı yalnız komissiya qərar qəbul edə bilər”.
Yeganə OQTAYQIZI
