İyunun 8-də Nəsimi rayon Məhkəməsi Ziyalılar Birliyinin rəhbəri, Milli Şuranın üzvü, kinodramaturq Eldəniz Quliyevin şikayətinə baxılıb.
2014-cü il oktyabrın 30-da Nəsimi rayon Məhkəməsi Eldəniz Quliyevi təhqir və böhtanda təqsirli bilərək ona 480 saat müddətində ictimai işlər, 140 manat linqvistik ekspertizanın haqqını ödəmək, 1000 manat cərimə və ölkədən çıxmamaq barədə cəza kəsib. Qərar daxili işlər naziri Ramil Usubovun xüsusi ittiham qaydasında iddiası əsasında çıxarılıb. Apelyasiya Məhkəməsi Nəsimi rayon Məhkəməsinin qərarını qüvvədə saxlayıb.
Eldəniz Quliyev Cinayət Məcəlləsinin 47.4.4 maddəsinə əsas götürərək 480 saatlıq işdən azad olunmağı haqqında yenidən məhkəməyə müraciət edib.
Məhkəmə ötən iclasda Sosial Müdafiə Fondundan pensiya yaşına çıxmaqla bağlı arayış və həkimdən sağlamlıq haqqında rəyin alınmasını əsas gətirərək proses təxirə salıb.
Eldəniz Quliyev Modern.az saytına bildirib ki, işə hakim Şamama Həsənovanın sədrliyi ilə baxılır: “Proses iyunun 30-na qədər təxirə salındı. Bu gün məhkəmədən tələb olunan pensiya yaşına çıxmaqla bağlı arayış və həkimdən sağlamlıq haqqında rəy alıb məhkəməyə təqdim etdim. Ədliyyə Nazirliyinin Məhkəmə Qərarlarının İcrası Baş İdarəsinin məhkəmədə iştirak etmədiklərini əsas gətirərək proses təxirə salındı.
Bu sənədləri təqdim etməyimə baxmayaraq, ictimai işləri yerinə yetirməmək kimi bir səlahiyyətim yoxdur. Onların fikrincə, xəstə olsam da mütləq ictimai işləri yerinə yetirməliyəm. Qisas ssenarisi davam edir. Fikirləşirlər ki, nə qədər çox işlətsələr, bir o qədər əzab-əziyyət verərlər, alçaldıb sındıralar”.
Yeganə OQTAYQIZI
