Türkiyədə keçirilən parlament seçkiləri dünya mətbuatının siyasi mövzuları arasında prioritet təşkil edir.
Artıq gündəmdə koalisiya hökumətinin qurulub-qurulmayacağıdır. Çünki hakim Ədalət və İnkişaf Partiyası (AKP) qalib olsa da, təkbaşına iqtidar yaratmaq üçün tələb olunan deputat yerləri əldə etməyib.Türkiyə hökumətinin üzvləri koalisiya ilə bağlı müxtəlif açıqlamalar veriblər.
Modern.az saytının Türkiyə KİV-nə istinadən verdiyi xəbərə görə baş nazirin müavini Yalçın Akdoğan bildirib ki, hər şeydə xeyr var.
“AKP-ni birinci etdiyi üçün millətimizə minnətdarlığımı bildirirəm. Prioritetimiz Türkiyədir”.
O qeyd edib ki, Xalqların Demokratik Partiyasının (HDP)-nin parlamentə keçməsi PKK ilə bağlı həll prosesinə təsir etməyəcək:
“HDP bundan sonra həll prosesinin ancaq filmini çəkər. Yəni bal-bal deməklə ağız şirin olmur, həmçinin sülh-sülh deməklə də olmur. Əgər 13 faiz səs toplayıblarsa, Qəndilə çağırış etsinlər və PKK-ya silah satsınlar”.
Enerji və Təbii Qaynaqlar naziri Taner Yıldız:
"Biz əlbəttə seçkinin bütün nəticələrini qurumlarımızda qiymətləndirəcəyik. Seçicinin verdiyi mesajı ən doğru şəkildə qəbul edəcəyik. Bir daha millətimizə AKP-ni birinci etdiyi üçün təşəkkür edirəm. Seçki prosesində dedik ki, vətəndaşın sandıqdakı səsləri başımız üstündədir. Hazırda da bunu təkrar edirik. Demokratiyaya hörmət yalnız sözdə deyil, əməldə də icra olunmalıdır. Seçkinin nəticələrini bütün partiyalar qiymətləndirəcək”.
Elm, Sənaye və Texnologiya naziri Fikri İşıq:
"AKP olaraq yaradıldığımız gündən bu günə qədər ən çox əhəmiyyət verdiyimiz nöqtə milli iradədir. Bundan sonra bu cədvəl istiqamətində hökumət qurmaq üçün bütün partiyalar lazımlı işləri edəcəkdir. İnşallah bir hökumətin qurulması mümkün olacaq. Amma bu olmazsa konstitusiyaya uyğun olaraq yenidən seçkinin keçirilməsi mümkündür”.
Modern.az
