“Xocasən qəsəbəsində müasir kampus tipli Pedaqoji Universitetin tikilməsi üçün hazırlıq işləri aparılıb”. Modern.az xəbər verir ki, bunu təhsil naziri Mikayıl Cabbarov deyib. O, ərazinin master planın hazır olduğunu və işlərə bir il bundan əvvəl başlanıldığını vurğulayıb.
“Master plana əsasən memarlar müxtəlif eskizlər təqdim edəcəklər. Pedaqoji Universitet bizim üçün çox mühüm rol oynayır. Həm təhsil ocağıdır, həm də bu universitetdə gələcəyin müəllimləri yetişir. Ona görə məhz bu universitetdən başladıq”.
M.Cabbarov yay düşərgələrinin təşkili məsələsindən də danışıb. Qeyd edib ki, yay düşərgələrində şagirdlər asudə vaxtlarını, yay tətillərini səmərəli şəkildə keçirəcəklər.
“Nazirliyin tabeliyində yay düşərgələri yoxdur. Ona görə də aidiyyəti qurumlarla əməkdaşlıq yolları aparılır ki, şagirdlərin asudə vaxtını, o cümlədən yay tətillərini keçirməsi məsələsinə baxaq. Ölkədə prezidentin təşəbbüsü ilə bu istiqamətdə müxtəlif layihələr həyata keçirilir. Məsələn, Təhsil Nazirliyinin dəstəklədiyi “Azərbaycanımızı tanıyaq” kimi layihə çərçivəsində bir bölgədə oxuyan şagirdlər ölkənin digər bölgələrinə gedirlər”.
Aytən Əliyeva
