“Müşahidəçi olduğum məntəqələrdə seçki tam şəffaf keçirildi. Hər hansı qanun pozuntusu baş vermədi”.
Bunu Modern.az saytına iyunun 7-də Türkiyə Böyük Millət Məclisinə keçirilən seçkilərdə Azərbaycandan müşahidəçi kimi iştirak edən Milli Məclisin Aqrar siyasət komitəsinin sədri Eldar İbrahimov deyib.
O bildirib ki, təqribən 50-yə yaxın məntəqədə seçki prosesini izləyib:
“Nizami Cəfərovla ikimiz Ankaranın Çanaqqala və Gölbaşı bölgələrində olduq. İkimiz təqribən 50-yə məntəqədə səsvermə prosesini izlədik. Bütün məntəqələrdə seçkilər normal və şəffaf keçdi. Vətəndaşların rahat gəlib səsverməsini də müşahidə elədik. Eyni zamanda, seçkidə aktivlik yüksək səviyyədə idi. Hətta yaşlı və xəstə vətəndaşlar belə gəlib səs verirdilər. Demək olar ki, çox yüksək səviyyədə seçki prosesi keçdi. Heç bir qayda pozuntusunu görmədik”.
Eldar İbrahimovun fikrincə, koalisiya hökuməti qurulsa belə, Azərbaycan - Türkiyə münasibətləri pozulmayacaq:
“Səsvermənin nəticələrinə görə, Türkiyədə ya koalisiya hökuməti qurulmalı, ya da növbədənkənar seçkilər keçirilməlidir. Əgər 45 gün ərzində hökumət formalaşmasa, yenidən seçkilər olacaq. Çünki hər bir partiya iddialıdır. Onların özləri heç vaxt birləşə bilməyəcək. Milliyyətçi Hərəkat Partiyası ilə Ədalət və İnkişaf Partiyasının koalisiya hökuməti qurmaq ehtimalı var.
Ümumiyyətlə, bu seçkinin nəticələrinə görə, heç bir halda Azərbaycan-Türkiyə münasibətlərinə xələl gəlməyəcək. Bizim münasibətlərimiz qardaşcasınadır. Hər ikimiz qardaş dövlətiyik. Onların bizə qarşı çox yüksək münasibəti var. Seçkidə kimlə danışırdıqsa, hər biri bizə qardaş münasibəti bəsləyirdi. On görə də heç bir başqa söhbət ola bilməz. Hansısa partiya birləşsə də, AKP yenə də əsas söz sahibidir. Onun rəhbəri Əhməd Davudoğlu, ölkə prezidenti isə Rəcəb Tayyib Ərdoğandır”.
SEVİNC YASİNQIZI
