“100 illik tarixi olan Müsavat Partiyası hər zaman e qəbul etdiyi nizamnaməyə uyğun olaraq hərəkət edir”. Bunu Modern.az saytına Müsavat başqanının müavini, Mərkəzi İcra Aparatının rəhbəri Gülağa Aslanlı bildirib.
Onun fikrincə, başqan Arif Hacılıya, lider İsa Qəmbərə, partiya hazırkı rəhbərliyinə qarşı basqılar davam edir: “Bu basqıların bir sıra səbəbləri var. Əsas səbəb ondan ibarətdir ki, partiya özünün prinsipial mövqeyindən kənara çəkilməyib, partiya yenə də mübarizənin önündədir. Müsavat mübarizəsini ardıcıl aparır, siyasi məhbusların azad olunması istiqamətində bütün addımları atır. Basqıların digər səbəbi Avropa Oyunları ərəfəsində siyasi məhbuslar azad olunmayacağı təqdirdə yarışların açılışına Avropa rəhbərlərinin gəlməməsini istəyən bəyanat yaymağımızdır.
Nəhayət, partiya bir çoxlarının istəyinin əksinə olaraq daha model şəkildə öz işini qurmağa çalışır. Təbii ki, bu, bir çox dairələri narahat edir. Bilərəkdən və ya bilməyərəkdən həmin dairələrin təsir altına düşən insanlar partiyaya qarşı təzyiqləri davam etdirir. Amma artıq bunun faydasının olmadığını dərk eləyənlər də var.
Yaxın zamanda onların hər biri səhv elədiyini anlayacaq. Etiraf eləməyə gücü çatan bunu edəcək, etməyənlər isə yenə də partiyaya qarşı şər, yalan və böhtanlar yağdıracaq. Onlara kim istəyir inansın. İnanmayanlar isə bilir ki, 100 illik tarixi olan partiya heç vaxt qəbul elədiyi nizamnaməyə uyğun olmayan hərəkət etməyəcək”.
Sevinc YASİNQIZI
