"Bakı 2015"də Azərbaycan millisinin bayraqdarı, cüdo üzrə dünya ikincisi Elmar Qasımov I Avropa Oyunlarında medal qazanmaq niyyətindədir.
Modern.az “Bakı 2015"in rəsmi saytına istinadən xəbər verir ki, cüdoçu Elmar Qasımovun əsas hədəfi Bakı 2015-də qızıl medal qazanmaqdır.
O bildirib ki, doğma vətənində keçiriləcək ilk Avropa Oyunlarının cüdo yarışlarının qalibi olmaq hədəfi ilə yanaşı yarış zamanı diqqətini cəmləyə bilmək bacarığı da onun uğuru üçün əsas olacaq:
“Tatamiyə çıxarkən rəqibimdən başqa heç nə düşünmürəm. Tatamidə olarkən hər şeyi unuduram və narahatlıq keçirmirəm. Qələbə mənim ilhamımdır”.
Hazırda 100 kq çəki dərəcəsində dünya reytinqində 2-ci yerdə olan Elmar Qasımov 2015-ci ildən indiyədək 3 qızıl medal qazanıb. Bu medalları Mərakeşdə keçirilmiş sonuncu Usta İdmançılar turnirində, Samsun və Tbilisi şəhərlərində baş tutmuş qran-prilərdə əldə edib.
24 yaşlı idmançı, həmçinin 2015-ci ilin mayında Bakıda keçirilmiş Böyük Dəbilqə turnirində gümüş medala sahib çıxıb.
Elmar Qasımov 2014-cü il Avropa Çempionatında 2-ci yerə yiyələnib.
Cüdo yarışları iyunun 25-dən etibarən 4 gün ərzində Heydər Əliyev adına İdman Arenasında keçiriləcək. Bu yarışlarda Avropadan 416 cüdoçu mübarizə aparacaq.
Sevinc YASİNQIZI
