Saymon Kleq: “Avropa Oyunları gözlədiyimdən də yaxşı keçir”
“Bütün dünyaya Azərbaycanla bağlı gözəl təsvirlər yayılır”. Modern.az xəbər verir ki, bunu Avropa Oyunları Əməliyyatlar Komitəsinin baş direktoru Saymon Kleq deyib.
Bu gün ənənəvi mətbuat konfransı keçirən baş direktor dünənki çıxışlar və bilet satışı barədə məlumat verib:
“14 məkanda 7 idman növü üzrə yarışlar oldu. 30 minə yaxın tamaşaçı oyunları izlədi. Dünən suya tullanmanın ilk günü olsa da, çox uğurlu alındı. Hətta bu gün orda tamaşaçılar üçün əlavə sektorlar açılıb. 1600-dən çox əlavə yer təmin olundu. Bu gün velosipedçilər gün ərzində yolla tanış olacaqlar. Ona görə də bəzi yollar bağlanacaq. Məhdudiyyətlər müvəqqəti olacaq. Sabah isə yarış keçiriləcək”.
Saymon Kleq qeyd edib ki, bu gün 12 idman növündə yarış olacaq:
“Stolüstü tennis və taekvondo yarışları bitəcək. Bu idman növlərinin keçirildiyi məkanlar digər yarışlar üçün hazırlanacaq”.
O, Olimpiya stadionunda keçiriləcək atletika yarışlarını böyük maraqla gözlədiyini söyləyib:
“Olimpiya stadionunun 68 min tamaşaçı yeri var. Sözsüz ki, bunun tam dolmasını gözləmirik. Ancaq marağın böyük olacağını düşünürük”.
Saymon Kleq bilet tapa bilməyən insanlara görə təəssüfləndiyini də vurğulayıb:
“Bəzi insanlar bilet almaq istəyir, ancaq tapa bilmir. Buna təəssüf edirəm. Amma mövcud biletlərdən də artığını sata bilmərik. Açıq havada olan yarışları insanlar sona qədər izləmirlər. Ora əlavə bilet sata bilmərik. Bəzi insanların bileti olsa da yarışlara gəlmirlər. Amma bağlı məkanlarda böyük sayda tamaşaçı olur. Xüsusən də güləş daha çox tamaşaçı cəlb edib. Ümumilikdə, tamaşaçı marağından məmnunuq. Bu, Azərbaycan üçün yenilik olduğundan, bilet alma mədəniyyəti də yavaş-yavaş formalaşır. Biletlərdən əldə olunan gəlir əsas komponent deyil. Çünki bu, təzə bazardır”.
Baş direktor sonda geridə qalan bir həftə ilə bağlı da təəssüratlarını bölüşüb:
“İlk həftə ümid etdiyimizdən də yaxşı keçdi. Bu da son 30 ayda aparılan planlaşdırmanın bəhrəsidir. Belə nəhəng tədbirlərdə çətinliklər olur. Amma Azərbaycanın ev sahibliyi oyunlara müsbət ab-hava gətirir. Bu günə kimi elə bir problemlə üzləşməmişik. Bunda Azərbaycan Milli Olimpiya Komitəsinin və idmançıların rolu böyükdür”.
Vüqar İsmayılov
